დღეს, 21 ნოემბერს, დუბაიში, ინტერპოლის გენერალურ ასამბლეაზე წევრი ქვეყნები ორგანიზაციის ახალ პრეზიდენტს აირჩევენ. დასავლური მედიის ცნობით, ახალი პრეზიდენტი შესაძლოა გახდეს რუსეთის შინაგან საქმეთა სამინისტროს მაღალჩინოსანი, გენერალი ალექსანდრე პროკოპჩუკი. ის 2016 წლიდან იკავებს ინტერპოლის ვიცე-პრეზიდენტის თანამდებობას.
ინტერპოლი პრეზიდენტობის ყველაზე რეალური კანდიდატ, რუს გენერალთან ერთად არის ორგანიზაციის ამჟამინდელი პრეზიდენტის მოვალეობის შემსრულებელი სამხრეთ კორეელი კიმ ჩენ იანგი.
ამერიკის შეერთებული შტატები ინტერპოლის ხელმძღვანელის არჩევნებზე სამხრეთ კორეელ კანდიდატს, კინ ჩენ იანს დაუჭერს მხარს. ამის შესახებ აშშ-ის სახელმწიფო მდივანმა განაცხადა.
მაიკ პომპეოს განმარტებით, კრიმინალური პოლიციის საერთაშორისო ორგანიზაციაში ქვეყნების წარმომადგენლებმა იმ პირს უნდა მისცენ ხმა, რომლის სახელიც „შებღალული“ არ არის. ამერიკელი დიპლომატის თქმით, სწორედ ასეთია ამჟამად ორგანიზაციის პრეზიდენტის მოვალეობის შემსრულებელი კიმ ჩენ იანი.
რუსი გენერლის ინტერპოლის პრეზიდენტად არჩევას ეწინააღმდეგებიან ამერიკელი სენატორები. მათი განცხადებით, რუსი გენერლის ინტერპოლის პრეზიდენტად არჩევა იგივეა, რომ მელას საქათმე ჩააბარო.
რუსი გენერლის ინტერპოლის შესაძლო არჩევას ეწინააღმდეგება უკრაინის შინაგან საქმეთა სამინისტრი. უკრაინის შს მინისტრის არსენ ავაქოვის განცხადებით, პროკოპჩუკის არჩევა ეწინააღმდეგება ორგანიზაციის მიზნებს. რუსი გენერლის არჩევის შემთხვევაში უკრაინა ინტერპოლის წევრობის შეჩერებას არ გამორიხცავს.
ინტერპოლის ხელმძღვანელის პოსტზე რუსი გენერლის არჩევა გააპროტესტა ლიეტუვამ. პარლამენტმა კენჭის უყარა დადგენილებას, რომლის მიხედვით, რუსი გენერლის არჩევის შემთხვევაში ლიეტუვა ინტერპოლს დატოვებს.
გენერალური ასამბლეის სხდომაზე ახალი პრეზიდენტის არჩევის საკითხი მას შემდეგ დადგა დღის წესრიგში, რაც მისი მოქმედი პრეზიდენტი მენგ ჰონვეი, მიმდინარე წლის ოქტომბერში გაუჩინარდა. მოგვიანებით, ჩინეთის მთავრობის განცხადებით, ის კორუფციის ბრალდებით დააკავეს.