საქართველოს საგარეო საქმეთა მინისტრმა დავით ზალკალიანმა დანიის სამეფოში ვიზიტის ფარგლებში შეხვედრა გამართა დანიის სამეფოს მიგრაციისა და ინტეგრაციის მინისტრთან ინგერ სტოიბერგთან.
საგარეო უწყების ინფორმაციით, შეხვედრაზე მხარეებმა ისაუბრეს მიგრაციის საკითხებზე საქართველო - დანიის თანამშრომლობის შესახებ. დანიის მხრიდან მაღალი შეფასება მიეცა საქართველოს მთავრობის მიერ გატარებულ ზომებს ევროკავშირის/შენგენის ზონაში უვიზო მიმოსვლის წესების დარღვევისა და თავშესაფრის მაძიებლის სტატუსის ბოროტად გამოყენების მცდელობების პრევენციის მიზნით. ასევე დადებითად შეფასდა საქართველოსა და დანიას შორის საპოლიციო სფეროში არსებული თანამშრომლობა.
შეხვედრაზე განხილულ იქნა დანიის მხრიდან საქართველოს უსაფრთხო წარმოშობის ქვეყნების სიაში შეყვანის საკითხი. აღინიშნა, რომ საქართველოს ამ მიმართულებით აქვს მნიშვნელოვანი მიღწევები და ევროკავშირის წვერი სახელმწიფოების ნაწილის მხრიდან უკვე აღიარებულია უსაფრთხო ქვეყნად.
მხარეები შეთანხმდნენ მომავალშიც აქტიურად ითანამშრომლონ მიგრაციის საკითხებთან დაკავშირებით, მათ შორის ამ მიმართულებით განახორციელონ თემატური ვიზიტები და შეხვედრები.
