ქალბატონი იას განცხადებაზე მხოლოდ ერთადერთი რამის თქმა შემიძლია - მისი გარდაცვლილი შვილის სულის პატივსაცემად, კომენტარზე უარს ვამბობ, - ამის შესახებ ხორავას ქუჩაზე მოკლული დავით სარალიძის მამამ, ზაზა სარალიძემ ბუტა რობაქიძის დედის, ია მეტრეველის მიერ დღეს გაკეთებულ განცხადებასთან დაკავშირებით აღნიშნა.
ცნობისთვის, დღეს ია მეტრეველმა განაცხადა, რომ "ზაზა სარალიძისთვის სახელმწიფოს არ მოუკლავს შვილი, საუბედუროდ ბავშვი ქუჩურ გარჩევებში მოკვდა, ბავშვებმა მოუკლეს შვილი". მისივე თქმით, "ყველანაირ საზღვარებს გასცდა, განსაკუთრებით სარალიძე".
„ნამდვილად არავინ გვაპატიებდა იმას, რაც დღეს ხდება. ყველანაირ საზღვრებს გასცდა, განსაკუთრებით სარალიძე, ეს უკვე დემოკრატიაშიც აღარ ჯდება. ჩემთვის მიუღებელია. სახელმწიფო კანონის ფარგლებში არ მოქმედებს და სახელმწიფო თავის პოლიციელს ვერ იცავს. და აგერ ადამიანი, პოლიციელიტვინის შერყევით საავადმყოფოში წევს. ეს როგორ შეიძლება? კიდევ ვიმეორებ, სარალიძისთვის სახელმწიფოს არ მოუკლავს შვილი, საუბედუროდ ბავშვი ქუჩურ გარჩევებში მოკვდა, ბავშვებმა მოუკლეს შვილი და ჩვენ პირდაპირ სახელმწიფომ დაგვიხვრია შვილები“, – თქვა მეტრეველმა.
ია მეტრეველის თქმით, ერთ წელიც არ დაიცადა ზაზა სარალიძემ, მაშინ როდესცა მთელი სახელმწიფო დგას ფეხზე, პროკურორი გადადგა, რომ სამართიანი განაჩენი დამდგარიყო. მისივე თქმით, გამოძიება მიმდინარეობს, ჯერ აპელაციაშიც არ არის საქმე, ძიება მიმდინარეობს და დაპატიმრებულია უამრავი ადამიანი.
„ჩემს საქმეში 6 დამნაშავეა და მათ 82 მოწმე ადებს ხელს ,ვერ დაუჭერიათ ის ადამიანები, ვინც ეს იარაღები დაყარა და ეს სპექტაკლი დადგა და სარალიძის შემთხვევაში დაჭერილია უამრავი ადამიანი შეუტყობინებლობის და დანაშაულის დაფარვის მუხლით", - განაცხადა ია მეტრეველმა.