15 ნოემბერს, 10:00 საათზე სასტუმროში „თბილისი მარიოტი“ საქართველოს სახალხო დამცველის მიერ, გაეროს ქალთა ორგანიზაციის მხარდაჭერით გაიმართება საერთაშორისო კონფერენცია „ფემიციდის შემთხვევების მონიტორინგი პრევენციისთვის“.
კონფერენციაზე წარმოდგენილი იქნება ფემიციდის შემთხვევების საერთაშორისო და ადგილობრივი კონტექსტი და 2017 წელს საქართველოში მომხდარი ქალთა მკვლელობების ანალიზი და ძირითადი მიგნებები.
კონფერენციაზე მისასალმებელი სიტყვით წარსდგებიან საქართველოს სახალხო დამცველი ნინო ლომჯარია, საქართველოს პრემიერ-მინისტრის თანაშემწე ადამიანის უფლებათა და გენდერული თანასწორობის საკითხებში სოფო ჯაფარიძე, საქართველოს პარლამენტის გენდერული თანასწორობის საბჭოს წევრი დიმიტრი ცქიტიშვილი და გაეროს ქალთა ორგანიზაციის პირველი წარმომადგენელი საქართველოში ერიკა კვაპილოვა. კონფერენციაზე ასევე მოხსენებით წარსდგება არგენტინის ომბუდსმენი ხუან ხოსე ბოკელი.
მოხსენებების დასრულების შემდეგ, საქართველოს სახალხო დამცველსა და არგენტინის ომბუდსმენს შორის მოხდება თანამშრომლობის მემორანდუმის გაფორმება.
კონფერენციაზე მოწვეული არიან სამთავრობო უწყებების, საერთაშორისო და ადგილობრივი ორგანიზაციების, აგრეთვე, საქართველოში აკრედიტებული საერთაშორისო მისიების წარმომადგენლები.
აღსანიშნავია, რომ საქართველოს სახალხო დამცველი 2016 წლიდან ახორციელებს ქალთა მკვლელობებზე სასამართლოს გადაწყვეტილებათა დეტალურ ანალიზს, რათა შეფასდეს ფემიციდის პრობლემის რეალური მასშტაბები, გამოყენებული დაცვისა და პრევენციის ღონისძიებები და პრობლემის სახელდებისას არსებული ხარვეზები.