„ევროპული საქართველო“ საპარლამენტო უმრავლესობას ხორავას ქუჩის საქმეზე დადგენილების პროექტის განხილვის ხელოვნურად გაჭიანურებაში ადანაშაულებს.
პარტიის წევრების თქმით, მმართველი გუნდი ამ პროცესს შეგნებულად, პოლიტიკური მოტივებით აჭიანურებს, რადგან ხელს აფარებს რეალურ დამნაშავეებს და არ სურს ყოფილ მაღალჩინოსნებს, შოთაძესა და ფხაკაძეს პასუხისმგებლობა დაეკისროთ.
„როდესაც ქუჩაში მიდის საპროტესტო აქციები, როდესაც იქ კარვის დადგმის საშუალებას არ აძლევენ, როდესაც ნაძვის ხის დადგმის გამო განდევნით ემუქრებიან. ქალბატონო ეკა, როგორც ჩანს თქვენ მიიღეთ ეს გადაწყვეტილება, რომ ამ საკითხებზე არ გემსჯელათ“, - განაცხადა ირაკლი აბესაძემ, რომელსაც იურიდიული კომიტეტის თავმჯდომარემ, ეკა ბესელიამ მიმართა, რომ მიკროფონი გამოერთო და „პოლიტიკური დემაგოგია“ შეეწყვიტა.
პარტიის წევრის, ოთარ კახიძის განცხადებით, ბიურომ იურიდულ კომიტეტს დააწერა როგორც ტყის კოდექსი, ისე დადგენილების პროექტი.
„თქვენ დღის წესრიგში ჩასვით ტყის კოდექსი, ვერ მოემზადეთ, ეხლა ეს არგუმენტი ვერ მიიღება უბრალოდ ქალბატონო ეკა. პროკურატურის სააპელაციო საჩივარი ქალბატონო ეკა ეხება გ. ბ.-ს მსჯავრდებას დავით სარალიძის მკვლელობისთვის, ამიტომ ჩვენ ვსაუბრობთ, რომ მ.კ.-ს უნდა წარედგინოს ბრალი“, - განაცხადა ოთარ კახიძემ, რის შემდეგაც, ეკა ბესელიამ კახიძისთვის მიკროფონის გამორთვა ითხოვა.
„გამოურთეთ მიკროფონი! რამდენიმე დღე მაინც უნდა იმუშაონ სპეციალისტებმა და უნდა მოამზადონ საკითხი. მოუმზადებლად საკითხის გამოტანა არ არის არც კორექტული, არც სწორი, არც მართებული, ამიტომ არც ვადას ვარღვევთ, არც პროცედურას ვარღვევთ. რატომ უნდა ყოფილიყო დღეს დღის წესრიგში შეტანილი, მე არ მესმის. ყურადღება, უკაცრავად, თქვენ აქ კომიტეტის სხდომაზე ხართ თუ მიტინგზე ხართ მოსული?! პასუხი მიიღე ოთარ და საკმარისია, არ ხარ პატარა ბავშვი რომ არ ხვდებოდე, რას გელაპარაკები“, - განაცხადა ეკა ბესელიამ.
იურიდიულმა კომიტეტმა საპარლამენტო უმცირესობას უარი უთხრა, დადგენილების პროექტი შეტანილიყო დღის წესრიგში, რის შემდეგაც, „ევროპულმა საქართველომ“ პროტესტის ნიშნად სხდომა დატოვა.