გამომდინარე იქიდან, რომ მთავრობაში ვიღაცები შეიძლება არ ვარგოდნენ, წარმოუდგენლად მიმაჩნია დაბრუნდეს ის ხელისუფლება, რომელიც ადამიანებზე ძალადობდა და წამებით იყო დაკავშირებული, - ამის შესახებ ფერისცვალების მამათა მონასტრის წინამძღვარმა, არქიმანდრიტმა ბართლომემ პრესკონფერენციაზე განაცხადა.
მისი თქმით, სააკაშვილი არა მარტო საქართველოს, არამედ ციხის პრობლემების გამო, სამყაროს წინაშე იყო დამნაშავე
„მე მღვდელი ვარ, დავდიოდი ციხეში, აღსარებებს ვიღებდი და ბოლოს აღარ გამიჩნდა სურვილი ციხეში მივსულიყავი. ისეთ რამეს ვისმენდი, რომ ვერავის ვეუბნებოდი და შინაგანად დიდი პრობლემა მქონდა. დატევა წარმოუდგენელი იყო. როცა ციხის პრობლემები, ასე რომ ვთქვათ „გასკდა“, მაშინ მე გლდანის ციხესთან მივედი და ვთქვი, რომ სააკაშვილი არა მარტო საქართველოს, არამედ ამ პრობლემების გამო, სამყაროს წინაშე იყო დამნაშავე“,- განაცხადა მან.
მისივე თქმით, ბიძინა ივანიშვილი პარტიაში იმის გამო დაბრუნდა, რომ მთავრობის გაზულუქებული ნაწილი ჩარჩოში მოაქციოს.
„სამწუხაროა, რომ როცა თანამდებობაზე მოვლენ, შემდგომ იწყებენ ადამიანებისკენ ზურგით დგომას, ამიტომაც დაბრუნდა ბიძინა ივანიშვილი პარტიაში, რომ მთავრობის გაზულუქებული ნაწილი ჩარჩოში მოაქციოს. ამბობენ, სასულიერო პირი პოლიტიკაში არ უნდა ერეოდესო. მე თუ მივდივარ არჩევნებზე და ჩემს მოქალაქეობრივ მოვალეობას ვიხდი, ე.ი. პოლიტიკაში ვმონაწილეობ. თუ ვინმეს აქვს უფლება, თავისი პოზიცია დააფიქსიროს, პედაგოგი იქნება, ჟურნალისტი, ექიმი, სასულიერო პირსაც აქვს. ეს ჩემი სუბიექტური აზრია“, – აღნიშნა მან.