„ქართული ოცნება“ დეპუტატების ნახევარმა თუ დატოვა და პარლამენტში უმრავლესობა აღარ იქნება, ვადამდელი საპარლამენტო არჩევნები იქნება, აბა, არ იქნება?, – ამის შესახებ გრიგოლ ვაშაძის საარჩევნო შტაბის ხელმძღვანელმა, გიორგი ვაშაძემ პირველი არხის გადაცემაში „პრეზიდენტის არჩევნები 2018“ განაცხადა.
გიორგი ვაშაძემ გადაცემის წამყვანის შეკითხვას უპასუხა, რა პოლიტიკური ინსტრუმენტი შეიძლება ჰქონდეს გრიგოლ ვაშაძეს გამარჯვების შემთხვევაში, რომ პოლიტიკური კრიზისი გამოიწვიოს და „ქართული ოცნების“ საკონსტიტუციო უმრავლესობამ ვადამდელი საპარლამენტო არჩევნების ჩატარება საჭიროდ ჩათვალოს.
„ეს მარტივია. თუ უმრავლესობა ნახევარზე მეტმა ადამიანმა დატოვა და პარლამენტში უმრავლესობა აღარ გვაქვს, მაშინ აბა, რა ხდება?! რატომ არ შეიძლება, რომ რიგგარეშე არჩევნები დაინიშნოს?! ვადამდელი საპარლამენტო არჩევნები იმ შემთხვევაში ჩატარდება, თუ ქვეყანაში პოლიტიკური კრიზისი შეიქმნება“, – განაცხადა ვაშაძემ.