საკრებულოში ფრაქცია "ნაციონალური მოძრაობის" წევრმა ევან ხაბეიშვილმა უმრავლესობის წევრებს დედაქალაქის მერისთვის, კახა კალაძისთვის საფეხბურთო კლუბ მილანის "ინტერის" მაისური გადასცა.
ხაბეიშვილის თქმით, კახა კალაძე ხალხის წინააღმდეგაა და ნაცვლად იმისა, რომ თბილისელების პრობლემებზე ფიქრობდნენ, მათ მოსისხლე მტრად უყურებს.
"მინდა მას [კახა კალაძეს] ვუთხრა - ეს არის მილანის "ინტერის" ფორმა. "მილანი" და "ინტერი" დაპირისპირებულები არიან. კალაძე თბილისელებს უყურებს, როგორც მოწინააღმდეგეებს. ეს ფორმა გადაეცით კალაძეს, თუ არადა, აქ დავტოვებ. მილანის "ინტერის" ფეხბურთელები არ არიან თბილისელები.
სწორედ ამის ნიშნად დღეს მას მოვუტანე მილანის "ინტერის" მაისური. როცა ეს კაცი "მილანში" თამაშობდა, მილანის "ინტერი" იყო მისი მოსისხლე მტერი. ახლა გამოვიდეს ამ როლიდან და როგორც "მილანის" ფეხბურთელი "ინტერის" ფეხბურთელებს უყურებდა მოსისხლე მტრად, ასე ნუ უყურებს თბილისელებს",- განაცხადა ხაბეიშვილმა.
მაისურის გადაცემის პროცესს საკრებულოს უმრავლესობის წევრი ილია ჯიშკარიანი შეეწინააღმდეგა, რის გამოც დეპუტატებს შორის სიტყვიერი კამათი და დაპირისპირება იყო.