რაღაც უცნაური ბაცილა შეეყარა ჩვენს საზოგადოებას, - ასე შეაფასა პრეზიდენტის პოლიტიკურმა მრჩეველმა ფიქრია ჩიხრაძემ ტელეკომპანია „პირველის“ ეთერში ფოტოგრაფ იური მეჩითოვის მიერ „ალჯაზირას“ ფილმში გაკეთებული განცხადება.
„ეს შოკი მე ბევრად ადრე მივიღე. გარკვეული კატეგორია ადამიანებისა, რომლებიც ჩვენთან ერთად იბრძოდნენ, საქართველოს გათავისუფლებისათვის, ეროვნული მოძრაობის წარმომადგენლები, უცებ აღმოჩნდნენ გაურკვეველ პოზიციაზე. ზოგადად დავარქმევ ამ პოზიციას საბჭოთა ნოსტალგიურ პოზიციას, რომელიც პერიოდულად პრორუსულ და რაღაც უცნაური პოზიციების გამოხატვაში ვლინდებოდა“, - განაცხადა ფიქრია ჩიხრაძემ და აღნიშნა, რომ როგორც ჩანს, ის თავისუფლება, რომელიც ცხოვრობდა საბჭოთა პერიოდში, არ არის თავისუფალი ამ სამწუხარო ბაცილისაგან.
„მე ვეწინააღდეგებოდი მოსაზრებას, როცა ამბობდნენ უფრსი თაობის წარმომადგენლები -ჩვენ რაღაცას ვერ მოვესწრებით და თქვენი თაობა - კი. იყო, რაღაც ბიბილირი დრო, 40 წელიწადი უნდა გაგვევლო, რომ ჩვენ სრულფასოვანი თავისუფლებისთვის მიგვეღწია. როგორც ჩანს, არის ამაში, რაღაც სიმართლე. ის თავისუფლება, რომელიც ცხოვრობდა საბჭოთა პერიოდში, როგორც ჩანს, არ არის თავისუფალი ამ სამწუხარო ბაცილისაგან თუ ოდნავ მიეცა გასაქანი. გასაქანას რა აძლევს ეს არის საკვლევი თემა. რაღაცნაირად ერთი პერიოდი ტაბუ იყო დადებული პრორუსული ნარატივების გაჩენაზე, შემდგომ ეს ტაბუ აიხსნა, წამოვიდა და წამოვიდა ეს უცნაური თემები და 9 აპრილის რევიზიასთანაც მივედით“, - განაცხადა ფიქრია ჩიხრაძემ და აღნიშნა, რომ 1989 წლის 9 აპრილის შემდგომი პოლიტიკოსების მიერ სათანადოდ არ არის შეფასებული რა მოხდა მაშინ.
შეგახსენებთ, კულტურის მინისტრის ყოფილი მოადგილე ამტკიცებს, რომ 1989 წლის 9 აპრილს რუსთაველის გამზირზე გამოსული მშვიდობიანი მოქალაქეები ოკუპანტებს ნიჩბებით არ მოუკლავთ.იური მეჩითოვმა ტელეარხ Al Jazeera-ს მიერ მომზადებულ ფილმში განაცხადა, რომ 1989 წლის 9 აპრილს 20 ქალბატონი დაიღუპა ასფიქსიის გამო. არავინ იყო დაჩეხილი, დაჭრილი, არ იყო მკვლელობები. „9 აპრილის პროტესტის დროს შეკრებილები 13-დან 25 წლამდე ასაკის ახალგაზრდები იყვნენ ძირითადად. 90% შეიკრიბა იმიტომ, რომ მათთვის ეს ერთგვარი შოუ იყო, რომელშიც მონაწილეობდნენ. ეს შედეგი დანაშაულებრივი ქმედება იყო მათ მხრიდან, ვინც ამის ორგანიზება მოაწყო. ეს ხელისუფლების ხელში ჩაგდების გეგმა იყო. არავის უნდოდა ვინმეს მოკვლა. ისინი დაიღუპნენ პანიკური გაქცევისას, 20 ქალბატონი დაიღუპა ასფიქსიის გამო. არავინ იყო დაჩეხილი, დაჭრილი, არ იყო მკვლელობები“, - განაცხადა იური მეჩითოვმა.