იური მეჩითოვის შეფასება 9 აპრილთან დაკავშირებით აბსოლუტურად მცდარია - ამის შესახებ საპარლამენტო უმრავლესობის წევრმა, დავით მათიკაშვილმა განაცხადა.
მისი თქმით, ეს არის ერთი ადამიანის წარმოდგენა, რაც აბსოლუტურად მცდარია.
„მე მახსოვს რა მასშტაბის აგრესიასთან ჰქონდა საქმე ჩვენს საზოგადოებას. ცხრა აპრილთან დაკავშირებით არა ერთი შემაჯამებელი დოკუმენტი დაიდო, სადაც აღნიშნულია რეალურად რა მოხდა, რით დაიღუპნენ ადამიანები. ასეთი შეფასებების გაკეთებისას მეტი ყურადღებაა საჭირო და მეტად უნდა გავაანალიზოთ ყველა ფაქტი, რაზეც ვსაუბრობთ.
იური მეჩითოვს არანაირი კავშირი არ აქვს ქართულ ოცნებასთან. ჩვენი ხელისუფლების დროს ძალიან ბევრმა ადამიანმა დაიკავა კონკრეტული თანამდებობები და შემდგომ დატოვა. ნებისმიერი ასეთი ადამიანის განცხადებაზე ჩვენ პასუხისმგებელნი ვერ ვიქნებით, თუმცა როგორც ერთი ადამიანის მოსაზრებაზე მე შემიძლია ვთქვა რომ ის ცდება შეფასებებში“, - განაცხადა მათიკაშვილმა.
შეგახსენებთ, კულტურის მინისტრის ყოფილი მოადგილე ამტკიცებს, რომ 1989 წლის 9 აპრილს რუსთაველის გამზირზე გამოსული მშვიდობიანი მოქალაქეები ოკუპანტებს ნიჩბებით არ მოუკლავთ.იური მეჩითოვმა ტელეარხ Al Jazeera-ს მიერ მომზადებულ ფილმში განაცხადა, რომ 1989 წლის 9 აპრილს 20 ქალბატონი დაიღუპა ასფიქსიის გამო. არავინ იყო დაჩეხილი, დაჭრილი, არ იყო მკვლელობები. „9 აპრილის პროტესტის დროს შეკრებილები 13-დან 25 წლამდე ასაკის ახალგაზრდები იყვნენ ძირითადად. 90% შეიკრიბა იმიტომ, რომ მათთვის ეს ერთგვარი შოუ იყო, რომელშიც მონაწილეობდნენ. ეს შედეგი დანაშაულებრივი ქმედება იყო მათ მხრიდან, ვინც ამის ორგანიზება მოაწყო. ეს ხელისუფლების ხელში ჩაგდების გეგმა იყო. არავის უნდოდა ვინმეს მოკვლა. ისინი დაიღუპნენ პანიკური გაქცევისას, 20 ქალბატონი დაიღუპა ასფიქსიის გამო. არავინ იყო დაჩეხილი, დაჭრილი, არ იყო მკვლელობები“, - განაცხადა იური მეჩითოვმა.