დღეს ბავშვთა ქალაქ „მზიურში“ პროექტ „განახლებული მზიურის“ პრეზენტაცია გაიმართა, რომელიც პარკის სრულ რეაბილიტაციას ითვალისწინებს. პროექტი საზოგადოებას თბილისის მერმა, კახა კალაძემ წარუდგინა.
სწორედ აქ გახდა ცნობილი, რომ, აღნიშნული პროექტის ფარგლებში, "მზიურის" ტერიტორიაზე ახალი, თბილისის მასშტაბით რიგით მეოთხე მედიათეკა გაიხსნება. მინი მედიათეკა ყოფილი საბაგირო გზის სადგურის შენობაში იქნება განთავსებული. აქვე იგეგმება თანამედროვე, მინიმალისტური სტილის საგამოფენო დარბაზის მოწყობაც.
მედიათეკის პროექტი უკვე მზად არის, მასზე მუშაობა უახლოეს მომავალში დაიწყება, თბილისის მაცხოვრებლები კი კიდევ ერთ კულტურულ-საგანმანათლებლო ცენტრს მიიღებენ.