„ევროპული საქართველო“ არსად ერთიანდება და დამოუკიდებელ პოლიტიკურ სუბიექტად რჩება, როგორც კი მეორე ტური დასრულდება და ივანიშვილის კანდიდატი დამარცხდება, მაშინვე ჩვეულ რეჟიმს დავუბრუნდებით, - ამის შესახებ პარტიის წევრმა ოთარ კახიძემ განაცხადა.
მისი განმარტებით, „ევროპულმა საქართველომ“ „ნაციონალურ მოძრაობასთან“ მემორანდუმი გააფორმა, რომელსაც პირნათლად ასრულებენ. მისივე თქმით, ეს წინასწარ იყო გამოცხადებული.
„სააკაშვილს არ უთქვამს, რომ ვერთიანდებით. ჩვენ განსხვავებები გვაქვს, მაგრამ ახლა ჩვენი ამოცანაა, ივანიშვილის კანდიდატი დავამარცხოთ. ეს არის მეორე ტურისთვის ერთი ფრონტის გახსნა, მაგრამ არ არის გაერთიანება. „ევროპული საქართველო“ არსად ერთიანდება და დამოუკიდებელ პოლიტიკურ სუბიექტად რჩება. როგორც კი მეორე ტური დასრულდება და ივანიშვილის კანდიდატი დამარცხდება, მაშინვე ჩვეულ რეჟიმს დავუბრუნდებით და პროპორციულ სისტემაზე გადასვლას მოვითხოვთ. პირობას ვასრულებთ, რომელიც დავდეთ. პირობის თანახმად ერთმანეთს აღარ ვაკრიტიკებთ და „ნაციონალური მოძრაობის“ კანდიდატთან ოპონირების რეჟიმში არ ვართ. მას მხარს ვუჭერთ, რადგან მიგვაჩნია, რომ სალომე ზურაბიშვილის გაპრეზიდენტება ქვეყნისთვის დამღუპველია. ყველაფერი უნდა გავაკეთოთ, რომ პრეზიდენტი ვაშაძე გახდეს და არა – ზურაბიშვილი”, – განაცხადა კაძიძემ.
ცნობისთვის, მიხეილ სააკაშვილმა გიგი უგულავასთან შეხვედრის შემდეგ განაცხადა - "ყველანი მივხვდით, რომ საბოლოო ჯამში ჩვენ ვართ ერთი ოჯახი".