ტურიზმის დეპარტამენტის ტურიზმის ეროვნული სააგენტოდ გარდაქმნა სექტემბრის ბოლომდე დასრულდება, ამის შესახებ სააგენტო "ჯი-ეიჩ-ენთან" საუბრისას ტურიზმის დეპარტამენტის თავმჯდომარემ მაია სიდამონიძემ განაცხადა.
სიდამონიძის განმარტებით, ტურიზმის ეროვნული სააგენტოს ჩამოყალიბების შემდეგ სამსახურის მუშაობა უფრო მოქნილი გახდება.
"მას შემდეგ, რაც ტურიზმის დეპარტამენტი ტურიზმის ეროვნული სააგენტოდ გარდაქმნება, საშუალება მოგვეცემა, ჩვენი საქმიანობის კომერციალიზაცია მოვახდინოთ. საუბარი არ არის რაიმე ტურისტული პროდუქტების გაყიდვაზე. მაგალითისთვის: სააგენტოს საშუალება ექნება, ტურისტებს სხვადასხვა სუვენირი შესთავაზოს, რაც მათ საქართველოში ყოფნის დღეებს შეახსენებს", - განაცხადა სიდამონიძემ.
ტურიზმის დეპარტამენტის გაუქმებისა და მის ნაცვლად ტურიზმის ეროვნული სააგენტოს შექმნის შესახებ განცხადება პირველად 10 აგვისტოს ეკონომიკისა და მდგრადი განვითარების მინისტრმა ვერა ქობალიამ გააკეთა. მინისტრის განმარტებით, ახალი უწყება უფრო ქმედითუნარიანი იქნება.