37 წლის ედიშერ სიგუა მარტვილის პოლიციას ძალადობასა და არაადამიანურ მოპყრობაში ადანაშაულებს.
როგორც დაზარალებული "რუსთავი 2"-თან საუბარში აღნიშნავს, ის ნასვამ მდგომარეობაში დააკავეს და ჯერ გზაში, შემდეგ კი პოლიციის განყოფილებაში სცემეს.
მისი თქმით, პოლიციის უფროსის მოადგილე, თორნიკე შულაია მას, სამ სხვა თანამშრომელთან ერთად სცემდა.
„მარტვილის პოლიციის თანამშრომლებმა მაწამეს, პოლიციაშიც, გზაშიც, მიყვანამდეც, პოლიციის შენობაშიც, შენობიდან კაპეზეში გადამიყვანეს, იქაც. როცა მირტყამდნენ, მაშინ თავზე მაფარებდნენ, მერე მიღებდნენ ვიდეოს, რომ ვაგინებდი და რომ ვპასუხობდი. ფეხიც შებმული მქონდა, ხელები უკან მქონდა დაბმული, დამაწევინებდნენ თავს დაბლა და მირტყამდნენ თავის არეში“, - განაცხადა ედიშერ სიგუამ.
ედიშერ სიგუას ოჯახი ექსპერტიზის ჩატარებას ითხოვს და გამოძიებისთვის პროკურატურას მიმართავს.
მომხდართან დაკავშირებით მარტვილის პოლიციაში ჯერჯერობით, კომენტარს არ აკეთებენ.