2008 წლის ომთან დაკავშირებით საპრეზიდენტო კანდიდატის, სალომე ზურაბიშვილი მხრიდან საბოლოო პოზიცია რაც იყო, არ სცდება საერთაშორისო შეფასებებს, - ამის შესახებ პარლამენტის თავმჯდომარის პირველმა მოადგილემ თამარ ჩუგოშვილმა განაცხადა.
რაც შეეხება „ევროპული საქართველოს" პრეზიდენტობის კანდიდატის დავით ბაქრაძის განცხადებას, რომ რუსეთი სალომე ზურაბიშვილის განცხადებებს ჰააგის სასამართლოში საქართველოს წინააღმდეგ იყენებს, ჩუგოშვილის თქმით, მას ამაზე ინფორმაცია არ აქვს.
„განცხადებები, რომელიც გაკეთდა ზურაბიშვილის მიერ, სხვადასხვაგვარი იყო. ვფიქრობ, რომ საპრეზიდენტო კანდიდატის მხრიდან ბოლოს რაც მოვისმინეთ და საბოლოო პოზიცია რაც იყო, არ სცდებოდა 2008 წლის ომთან დაკავშირებით საერთაშორისო შეფასებებს. კონკრეტულად რუსეთის მხრიდან რა იყო მტკიცებულებებად წარდგენილი და ამას რა გავლენა შეიძლება ჰქონდეს პროცესზე, ეს იუსტიციის სამინისტრომ შეიძლება თქვას უფრო კომპეტენტურად.
ეს ინფორმაცია შეიძლება ჰქონდეს მხოლოდ იუსტიციის სამინისტროს, როგორც ქვეყნის წარმომადგენელს, თუ რა მტკიცებულებები აქვს რუსეთის მხარეს წარდგენილი. ამიტომ სწორი იქნება, თუ დეტალებზე იუსტიციის სამინისტრო ისაუბრებს", - განაცხადა ჩუგოშვილმა.
ცნობისთვის, "ევროპული საქართველოს" პრეზიდენტობის კანდიდატმა დავით ბაქრაძემ ბრიფინგი გამართა, სადაც განაცხადა, რომ ჰააგაში საქართველოს მიერ შეტანილ სარჩელზე რუსეთის წინააღმდეგ რუსეთმა მოამზადა საპასუხო სარჩელი რომელშიც არგუმენტებად მოყვანილია ციტატები სალომე ზურაბიშვილის წიგნიდან.
