საქართველოს პრემიერ-მინისტრი სავაჭრო დეფიციტის შემცირებას ელექტრომობილების წარმოებაში ხედავს. როგორც მამუკა ბახტაძე აცხადებს, იმპორტის ჩამონათვალში ნომერ პირველ ადგილზე გახლავთ საწვავი.
„საწვავზე მოდის ჩვენი იმპორტის ყველაზე დიდი წილი. აქედან გამომდინარე, ელექტრომობილებზე გადართვა აქვს დამატებითი უზარმაზარი მაკროეკონომიკური ეფექტი, რომელიც საშუალებას მოგვცემს, საქართველოში შევქმნათ მეტი დოვლათი, შევამციროთ სავაჭრო დეფიციტი და ამასთან, გავაჩინოთ მსხვილი მომხმარებელი ადგილზე წარმოებული ელექტროენერგიის“, – განაცხადა პრემიერმა.
მისი თქმით, საქართველოში ელექტრომობილების შემოყვანა მომდევნო კვირიდან დაიწყება საქართველოში და შემდეგი ერთი წლის განმავლობაში, ე.წ. ქარშეარინგის პრინციპით, ორი ათასზე მეტი ავტომობილი შემოვა.
„საუბარია საზიარო ავტომობილების პრინციპზე, რომელსაც უზარმაზარი უპირატესობა აქვს. ეს მნიშვნელოვნად შეამცირებს ტრაფიკს ჩვენს დედაქალაქში და ამავე დროს, ხელს შეუწყობს, რომ ელექტრომობილები კიდევ უფრო პოპულარული გახდეს ადგილობრივ ბაზარზე“, – განაცხადა მამუკა ბახტაძემ.