„იმპორტ-ექსპორტის გაზრდილი მაჩვენებლები ნათელი შედეგია იმ აქტივობების, რომლებიც ქვეყანაში საგარეო ვაჭრობის ხელშესაწყობად ხორციელდება“- ასე აფასებს საქართველოს სავაჭრო-სამრეწველო პალატის პრეზიდენტი ნინო ჩიქოვანი „საქსტატის“ მიერ გამოქვეყნებულ სტატისტიკას საგარეო ვაჭრობასთან დაკავშირებით.
როგორც ნინო ჩიქოვანი აღნიშნავს, პალატის საქმიანობის ძირითადი ნაწილი სწორედ საგარეო ვაჭრობის ხელშეწყობას ემსახურება და სასიხარულოა, რომ წლიდან წლამდე საგარეო სავაჭრო ბრუნვის სტატისტიკა იმატებს.
„აღსანიშნავია, რომ ექსპორტი ევროკავშირის ქვეყნებში 13.2%-ით გაიზარდა და 533.0 მლნ. აშშ. დოლარი შეადგინა. საქართველოს სავაჭრო-სამრეწველო პალატის ერთ-ერთი აქტიური და მოთხოვნადი სერვისი “DCFTA საინფორმაციო ცენტრი“-ა, რომელიც ევროკავშირის ბაზრის რეგულაციების შესახებ მეწარმეთა ინფორმირებას ემსახურება. გარდა ევროკავშირის ბაზრისა, ჩვენი ბენეფიციარები ინფორმაციას იღებენ იმ სტანდარტების შესახებ, რომლებიც ეტაპობრივად ადგილობრივ ბაზარზეც უნდა დააკმაყოფილონ. ჩვენი ცენტრისადმი მეწარმეთა მომართვიანობით თუ ვიმსჯელებთ, ნათლად ჩანს, რომ ადგილობრივ მეწარმეთა ინტერესი ევროკავშირის ბაზრის მიმართ დღითიდღე იზრდება. გარდა ევროკავშირისა, პალატა მუშაობს მეწარმეთათვის სხვა საექსპორტო ბაზრების მოძიებაზეც. ამისთვის ჩვენ გავააქტიურეთ სერვისი „მოიძიე პარტნიორი“ და ორგანიზებას ვუწევთ საერთაშორისო ფორუმებს, რომლებიც საქართველოს მეწარმე-სუბიექტებისთვის საერთაშორისო ბიზნეს-პარტნიორების მოძიების ეფექტიანი პლატფორმაა. 2019 წლის განმავლობაში პალატა გეგმავს საქართველოს რეგიონებში საერთაშორისო ფორუმების გამართვას, რაც რეგიონულ ბიზნესს დამატებით პერსპექტივას გაუჩენს საერთაშორისო ბაზრებზე გასასვლელად. იმედი გვაქვს ჩვენი ძალისხმევა და აქტივობები მომდევნო წლის ანალოგიურ სტატისტიკაში კიდევ უფრო დადებითად აისახება“- განაცხადა საქართველოს სავაჭრო-სამრეწველო პალატის პრეზიდენტმა თემის კომენტირებისას.
„საქსტატის“ მიერ გამოქვეყნებული სტატილსტიკის შესაბამისად, 2018 წლის სექტემბერში წინა წელთან შედარებით ექსპორტის 17.1 პროცენტიანი ზრდა დაფიქსირდა და მისმა მოცულობამ 301.7 მლნ. აშშ. დოლარი შეადგინა. მიმდინარე წლის სექტემბერში იმპორტი 3.3 პროცენტით გაიზარდა და 711.4 მლნ. აშშ. დოლარს გაუტოლდა. საგარეო სავაჭრო ბრუნვა გაიზარდა 7.1 პროცენტით გაიზარდა და 1013.2 მლნ. აშშ. დოლარი შეადგინა. მიმდინარე წლის სექტემბერში სავაჭრო ბალანსი 21.1 მლნ. აშშ. დოლარით გაუმჯობესდა. უარყოფითმა სავაჭრო ბალანსმა 409.7 მლნ.აშშ.დოლარი, საგარეო სავაჭრო ბრუნვის 40.4 პროცენტი შეადგინა და წინა წლის სექტემბერთან შედარებით მნიშვნელოვანდ - 5.1 პროცენტული პუნქტით გაუმჯობესდა.