თბილისში, ბარნოვზე 25 წლის თაკო გამრეკელაშვილის მკვლელობაში ბრალდებული
მამინაცვლის, ვეფხია ბაქრაძის პროცესი ამ წუთებში თბილისის საქალაქო სასამართლოში მიმდინარეობს.
დღევანდელ სხდომაზე ბრალდების მხარე სამ მოწმეს, ექპსერტს, კუმისში არსებული ერთ- ერთი საცხოვრებელი სახლის მეპატრონესა და ბენზინგასამართი სადგურის თანამშრომელს დაკითხავს.
ექპსერტმა, რომელიც სასამართლოს ჩვენებას აძლევს, ტექნოლოგიური ექსპერტიზა ჩაატარა. საუბარია, ამოღებულ ტელეფონებზე ჩატარებულ ექსპერტიზაზე.
კუმისში მდებარე საცხოვრებელი სახლის მეპატრონე კი სავარაუდოდ, იმ ფაქტთან დაკავშირებით ისაუბრებს, რაზეც ბრალდებულ ვეფხია ბაქრაძეს მისი ყოფილი მეუღლის თავისუფლების უკანონო აღკვეთისთვის, ბრალი აქვს დამძიმებული.
რაც შეეხება, ბენზინგასამართი სადგურის თანამშრონელს, ის სავარაუდოდ, ისაუბრებს იმ ფაქტთან დაკავშირებით, რომ ვეფხია ბაქრაძემ იქ ბენზინი შეიძინა, რითიც, გამოძიების ინფორმაციით, ბრალდებული გამრეკელაშვილის სახლის დაწვას აპირებდა.
შეგახსენებთ, რომ თაკო გამრეკელაშვილი მიმდინარე წლის 13 აპრილს, თბილისში, ბარნოვის ქუჩაზე მოკლეს. მას ყელი ჰქონდა გამოჭრილი. აღნიშნულ დანაშაულზე სამართალდამცავებმა მოკლულის მამინაცვალი, ვეფხია ბაქრაძე 14 აპრილს, თელეთში დააკავეს. ის მიმალვაში იმყოფებოდა.
გამოძიება 11 პრიმა 109-ე მუხლით მიმდინარეობს, რაც ოჯახში ძალადობის ნიადაგზე ჩადენილ განზრახ მკვლელობას დამამძიმებელ გარემოებაში გულისხმობს. აღნიშნული მუხლი 16-დან 20 წლამდე ან უვადო პატიმრობას ითვალისწინებს.
სამართალდამცველებმა ბარნოვის ქუჩაზე მომხდარი მკვლელობის საქმეზე კიდევ ერთი პირი, ბრალდებულ ვეფხია ბაქრაძის ბიძაშვილი, თემურ ბაქრაძე დაკავეს. მას ბრალი დანაშაულის შეუტყობინებლობისსთვის აქვს წაყენებული. ჩადენილი დანაშაული 2-დან 4 წლამდე ვადით თავისუფლების აღკვეთას ითვალისწინებს.
სამედიცინო ექსპერტიზის დასკვნით, თაკო გამრეკელაშვილს აღენიშნებოდა 33 ჭრილობა, ასევე აღენიშნებოდა მრავალი სისხლნაჟღენთი დაზიანება. 33 ნაკვეთი-ნაჩხვლეტი ჭრილობიდან 8 კისრის არეში იყო შემავალი, 2 გულ-მკერდის არეში, დანარჩენი სხვადასხვა ადგილებზე. კისრის და ყელის არეში არსებულმა დაზიანებებმა გამოიწვია გარდაცვალება.
