ბარნოვის ქუჩაზე 25 წლის თაკო გამრეკელაშვილის მკვლელობაში ბრალდებული მამინაცვლის, ვეფხია ბაქრაძის სასამართლო პროცესი თბილისის საქალაქო სასამართლოში ხვალ, 19 ოქტომბერს, 14:00 საათზეა ჩანიშნული.
ხვალინდელ სხდომაზე კვლავ სახელმწიფო ბრალდება გამოიკვლევს თავის მტკიცებულებებს. სასამართლოს ჩვენება უკვე მისცეს მოკლული ქალის დამ და მისმა მცირეწლოვანმა შვილმა.
გამრეკელაშვილის 7 წლის ბავშვის ჩვენებით, თაკო სწორედ ვეფხია ბაქრაძემ მოკლა. უფრო მეტიც, მცირეწლოვანმა მის მიერ მიცემულ ჩვენებაში ისაუბრა იმაზეც, რომ მას მკვლელობაში ბრალდებული დედისთვის დანის დარტყმას აიძულებდა.
შეგახსენებთ, რომ თაკო გამრეკელაშვილი მიმდინარე წლის 13 აპრილს, თბილისში, ბარნოვის ქუჩაზე მოკლეს. მას ყელი ჰქონდა გამოჭრილი. აღნიშნულ დანაშაულზე სამართალდამცავებმა მოკლულის მამინაცვალი, ვეფხია ბაქრაძე 14 აპრილს, თელეთში დააკავეს. ის მიმალვაში იმყოფებოდა.
გამოძიება 11 პრიმა 109-ე მუხლით მიმდინარეობს, რაც ოჯახში ძალადობის ნიადაგზე ჩადენილ განზრახ მკვლელობას დამამძიმებელ გარემოებაში გულისხმობს. აღნიშნული მუხლი 16-დან 20 წლამდე ან უვადო პატიმრობას ითვალისწინებს.
სამართალდამცველებმა ბარნოვის ქუჩაზე მომხდარი მკვლელობის საქმეზე კიდევ ერთი პირი, ბრალდებულ ვეფხია ბაქრაძის ბიძაშვილი, თემურ ბაქრაძე დააკავეს. მას ბრალი დანაშაულის შეუტყობინებლობისთვის აქვს წაყენებული. ჩადენილი დანაშაული 2-დან 4 წლამდე ვადით თავისუფლების აღკვეთას ითვალისწინებს.
სამედიცინო ექსპერტიზის დასკვნით, თაკო გამრეკელაშვილს აღენიშნებოდა 33 ჭრილობა, ასევე აღენიშნებოდა მრავალი სისხლნაჟღენთი დაზიანება. 33 ნაკვეთი-ნაჩხვლეტი ჭრილობიდან 8 კისრის არეში იყო შემავალი, 2 გულ-მკერდის არეში, დანარჩენი სხვადასხვა ადგილებზე. კისრის და ყელის არეში არსებულმა დაზიანებებმა გამოიწვია გარდაცვალება.