თარიღი    დრო

მექატრონიკა და მექანიკის ინჟინერიის ტექნიკოსი - სწორი პროფესიული არჩევანი ახალგაზრდებისთვის

საქართველო, თბილისი - 17:50 10.18.2018 490

საქართველოს ტექნიკური უნივერსიტეტის ტექნიკური გადამზადების ცენტრი დაინტერესებულ ახალგაზრდებს, წელს, დასაქმების ბაზარზე ყველაზე მეტად მოთხოვნად, V საფეხურის ორ მოდულურ პროფესიულ საგანმანათლებლო პროგრამას სთავაზობს: მექატრონიკა და მექანიკის ინჟინერიის ტექნიკოსი.

ორივე პროგრამაზე სწავლის ხანგრძლივობა 20 თვეს შეადგენს და და ორივე პროგრამა სრულადაა დაფინანსებული სახელმწიფოს მიერ. სწავლების პროცესი მორგებულია სპეციალური საჭიროების მქონე პირების მოთხოვნებზე.

ტექნიკური გადამზადების ცენტრის პროფესიულ პროგრამებზე ჩარიცხვის წინაპირობა სრული საშუალო განათლება და პროფესიული ტესტირების შედეგებია. სწავლის წარმატებით დასრულების შემდეგ კი სტუდენტებს ორმაგი, ქართულ-გერმანული დიპლომი გადაეცემათ. იმის გათვალისწინებით, რომ ორივე პროფესიულ პროგრამაზე რეალურად დიდი მოთხოვანა საქართველოს დასაქმების ბაზარზე, ტექნიკური გადამზადების ცენტრის კურსდამთავრებულები, რომლებიც იზრუნებენ იმისთვის, რომ კარგ სპეციალიტებად ჩამოყალიბდნენ, წარმატებით დასაქმდებიან ენერგეტიკისა და კომუნიკაციის სფეროში, მანქანათმშენებლობის სექტორში, მსუბუქსა და კვების მრეწველობაში და სხვა სტექნიკურ სფეროებში მოქმედ მსხვილ თუ საშუალო კომპანიებში.

პროფესიულ პროგრამებზე ჩარიცხვით დაინტერესებული ახალგაზრდები სტუ-ის ტექნიკური გადამზადების ცენტრმა სპეციალურად გამართულ ღია კარის დღეზე მიიწვია და მეტროსადგურ „სამგორთან“ მდებარე ახლადგარემონტებული შენობა და სასწავლო ინფრასტრუქტურა დაათვალიერებინა.   

ახალგაზრდებს შესაძლებლობა მიეცათ, შეთავაზებული პროფესიული პროგრამების შესახებ ამომწურავი ინფორმაცია მიეღოთ, პირადად გასაუბრებოდნენ ცენტრის მენეჯერს, პროგრამების ხელმძღვანელებსა და პროფესორ-მასწავლებლებს, ენახათ უახლესი ტექნიკა-დანადგარებით აღჭურვილი სასწავლო ინფრასტრუქტურა, როგორიცაა მექატრონული სისტემების ლაბორატორია, სადაც მანქანა-დანადგარების დაგეგმა-ინსტალაციისთვის, პროგრამირებისა და ტესტირებისთვის ყოველგვარი პირობაა შექმნილი; დაბალი და მაღალი ძაბვის ლაბორატორიები, სადაც ელექტროტექნიკოსისთვის აუცილებელი ყველა უნარ-ჩვევის გამომუშავებაა შესაძლებელი; მექანიკის ინჟინერიის ლაბორატორია, სადაც რეალურადაა შესაძლებელი ლითონის დამუშავება, ტექნიკური სისტემების, მექანიკური მოწყობილობისა და მექანიზმების დაპროექტება-დამზადება; სამრეწველო ავტომატიზაციის ლაბორატორია, სადაც ასევე რეალურადაა შესაძლებელი ავტომატიზირებული სისტემების დაგეგმვა-ინსტალაცია, მანქანა-დანადგარების დიზაინზე მუშაობა, მათი დიაგნიოსტიკა და პროგრამირება.

მნიშვნელოვანია ისიც, რომ სასწავლო ინფრასტრუქტურის დათვალიერების შემდეგ, ტექნიკური გადამზადების ცენტრის პროფესიული პროგრამების ხელმძღვანელები მომავალ სტუდენტებს სამომავლო დასაქმების რეალურ პერსპექტივებზეც ესაუბრნენ.

ტექნიკური უნივერსიტეტის ტექნიკური გადამზადების ცენტრში, მოდულურ პროფესიულ საგანმანათლებლო  პროგრამებზე რეგისტრაცია 19 ოქტომბრის ჩათვლით გრძელდება. მსურველები, რომელთა ასაკი შეზღუდული არ არის, რეგისტრაციის გავლას შეძლებენ პირადობის მოწმობით, ყოველდღე, 10:00-დან 17:00 საათამდე, სტუ-ის ადმინისტრაციულ კორპუსში (კოსტავას 77, მე-3 სართ., ოთახი №352); ასევე, საქართველოს მასშტაბით, რესურსცენტრებსა და პროფესიული პროგრამების განმახორციელებელ ნებისმიერ დაწესებულებაში. დარეგისტრირება შესაძლებელია ელექტრონულადაც, ბმულის

https://vet.emis.ge/#/registration მეშვეობით.

საქართველოს ტექნიკური უნივერსიტეტის ტექნიკური გადამზადების ცენტრის საქმიანობასა და შეთავაზებულ პროფესიულ პროგრამებზე უფრო ვრცლად ცენტრის მენეჯერდ, ვიქტორ ბარამიას ვესაუბრეთ:

  • პირველ რიგში, ყველა დაინტერესებულ პირს გვინდა შევახსენოთ, რომ ტექნიკური უნივერსიტეტის ტექნიკური გადამზადების ცენტრში, მოდულურ პროფესიულ საგანმანათლებლო პროგრამებზე რეგისტრაცია 19 ოქტომბრის ჩათვლით გრძელდება. დარეგისტრირების მსურველტა ასაკი არ არის შეზღუდული. რეგისტრაციის გავლა კი შესაძლებელია პირადობის მოწმობით, 10:00-დან 17:00 საათამდე, ტექნიკური უნივერსიტეტის ადმინისტრაციულ კორპუსში (მ. კოსტავას 77), მე-3 სართულზე, #352-ე ოთახში; დარეგისტრირება ასევე, შესაძლებელია საქართველოს მასშტაბით, რესურსცენტრებში და ელექტრონულადაც - https://vet.emis.ge/#/registration  

 

  • რა მიზნს ემსახურება ტექნიკური გადამზადების ცენტრის შექმნა? რამდენადაც ვიცით, ცენტრი წელს მეოთხედ აცხადებს მიღებას პროფესიულ პროგრამებზე
  • ტექნიკური გადამზადების ცენტრის (GTTC) შექმნა საქართველოს ტექნიკური უნივერსიტეტისა და BP საქართველოს ერთობლივი ინიციატივაა, რომელიც მხარდაჭერილია „ათასწლეულის გამოწვევის ფონდი - საქართველო“-ს მიერ. ვფიქრობთ, ეს მნიშვნელოვანი პროექტია, რომელიც ხორციელდება „პროფესიული განათლება ეკონომიკის განვითარებისათვის“ პროექტის ფარგლებში. ეს ერთობლივი ინიციატივა მიზნად ისახავს ბაზრის მოთხოვნებზე ორიენტირებული პროფესიული პროგრამების შეთავაზებას და ამ გზით, საქართველოში პროფესიული განათლების გაუმჯობესებასა და განვითარებას და რაც მთავარია, მაღალი საერთაშორისო სტანდარტის დაწესებას. ეს პროექტი ხორციელდება ათასწლეულის გამოწვევის კორპორაციის დაფინანსებით, აშშ-ის და საქართველოს მთავრობებს შორის გაფორმებული მეორე, 140 მლნ აშშ დოლარის კომპაქტის ფარგლებში.
  • რით არის მნიშვნელოვანი ტექნიკური გადამზადების ცენტრის პროგრამები და რატომ უნდა აირჩიონ ეს პროგრამები ახალგაზრდებმა?
  • აუცილებლად უნდა აღინიშნოს, რომ ეს ის პროფესიული პროგრამებია, რომელიც აქამდე არ არსებობდა საქართველოს პროფესიული განათლების ბაზარზე. ეს სრულიად ახალი პროგრამებია და მათი შემუშავება მოხდა ქართველი და გერმანელი კონსულტანტებისა და სპეციალისტების თანამშრომლობით. აქედან გამომდინარე, ჩვენი ყველა პროგრამა მაქსიმალურადაა მიახლოებული გერმანულ სტანდარტთან. არანაკლებ მნიშვნელოვანია ისიც, რომ წარმატებული კურსდამთავრებულები, ქართულ დიპლომთან ერთად, მიიღებენ გერმანულ სერთიფიკატს. წელს უკვე, პროფესიული სწავლების პროცესი წარიმართება ცენტრის ახლადგარემონტებულ შენობაში, რომელიც მორგებულია შეზღუდული შესაძლებლობის მქონე პირების საჭიროებებზეც.  შენობაში განთავსებულია თანამედროვე  ლაბორატორიები უახლესი აღჭურვილობითა და ტექნიკა-დანადგარებით, რომელიც გერმანულმა კომპანია „ფესტომ“ მოგვაწოდა. აქედან გამომდინარე, სწავლის პროცესი და ცენტრის ინფრასტრუქტურა ერთიანად თავსდება გერმანულ სტანდარტში და ესადაგება სწავლების გერმანულ მიდგომებს. რაც შეეხება ჩვენს ლექტორებსა და პროფესიული პროგრამების ხელმძღვანელებს, ისინი დატრენინგებული არიან გერმანელი და სხვა საერთაშორისო სპეციალისტების, ასევე კომპანია „ფესტოს“ ექსპერტების მიერ.
  • რამდენი მოქმედი პროფესიული პროგრამაა ცენტრში? წელს ორ პროგრამაზე აცხადებთ მიღებას.
  • ამ ეტაპზე, ცენტრს აქვს ოთხი მოქმედი მოდულური პროფესიული პროგრამა: მექანიკის ინჟინერიის ტექნიკოსი, მექატრონიკა, სამრეწველო ავტომატიზაცია და მაღალი ძაბვის ელექტროტექნიკოსი. აქედან, სამი პროგრამა თითქმის 2-წლიანია, ერთი კი - ერთწლიანი. ჩვენი პროფესიული პროგრამები რეალურად მოთხოვნადია დასაქმების ბაზარზე და ამავდროულად, დეფიციტურიც. წელს, საშემოდგომო მიღებას მხოლოდ ორ პროგრამაზე ვაცხადებთ - ეს არის მექატრონიკა და მექანიკის ინჟინერიის ტექნიკოსი.

პროფესიული განათლების სპეციფიკიდან გამომდინარე, სწავლების პერიოდში აქცენტი, მეტწილად, პრაქტიკულ სწავლებასა და მუშაობაზე კეთდება - ვგულისხმობთ პრაქტიკულ სამუშაოებს, როგორც ჩვენს შენობაში განთავსებულ ლაბორატორიებში, ასევე, სამრეწველო პრაქტიკას მოქმედ კომპანიებში. სწორედ ამ მიზნით, ცენტრს გაფორმებული აქვს ხელშეკრულებები სხვადასხვა სპეციფიკის მქონე კომპანიასთან, რაც საშუალებას აძლევს ჩვენს სტუდენტებს, სწავლის პროცესში შეძენილი თეორიული თუ პრაქტიკული უნარები და ცოდნა რეალურ საქმიანობაში გამოიყენონ და გაამყარონ. ეს საუკეთესო საშუალებაა ჩვენი სტუდენტების კარგ სპეციალისტებად ფორმირებისთვის. აქტიურად ვმუშაობთ ყველა იმ კომპანიასთან, რომელთანაც ხელშეკრულება გვაქვს გაფორმებული, ასევე იმ კომპანიებთან, რომლებიც საქართველოს ბაზარზეა წარმოდგენილი. ვცდილობთ, მაქსიმალურად შევუწყოთ ხელი ჩვენს სტუდენტებს, ჰქონდეთ მრავალფეროვანი არჩევანი, გაეცნონ სხვადასხვა კომპანიის საქმიანობას და, პირიქით, კომპანიებსაც მიეცეთ საშუალება, აღმოაჩინონ კარგი სტუდენტები და იზრუნონ თავინთ მომავალ კადრებზე.

  • რა პერსპექტივა აქვს სტუდენტს, რომელიც ტექნიკური გადამზადების ცენტრის პროფესიულ პროგრამას დაასრულებს?
  • ჩვენი ყველა პროფესიული პროგრამა წინასწარი კვლევის საფუძველზე შეირჩა. სწორედ ამ კვლევამ გვიჩვენა საქართველოს ბაზარზე რეალურად მოთხოვნადი პროფესიები. ის გარემოებაც, რომ ჩვენს სტუდენტებს საწარმოო პრაქტიკის გავლა შეუძლიათ, არაჩვეულებრივი შესაძლებლობაა, უშუალოდ შეეხონ იმ კომპანიებს, რომლებთანაც, სამომავლოდ, რეალური საქმიანი ურთიერთობა შეიძლება ჩამოუყალიბდეთ. ასე რომ, სასწავლო თუ საწარმოო პრაქტიკა და სტაჟირება ძალიან მნიშვნელოვანი პროცესია. ამ პროცესში სტუდენტმა მაქსიმალურად უნდა შეძლოს საკუთარი შესაძლებლობების გამოვლენა. არაერთი პრეცედენტი გვქონია იმისა, რომ კომპანიები უშუალოდ დაინტერესებულან ამ თუ იმ სტუდენტით. ეს წარმატებით დასაქმების ერთ-ერთი საშუალებაა. გარდა ამისა, სპეციალურად ვმუშაობთ კომპანიებთან ჩვენი სტუდენტების სამომავლო დასაქმების მიმართულებით, ასევე, ვთანამშრომლობთ ე.წ. შუამავალ რგოლთან - დასაქმების კომპანიებთან, რომლებიც კარგად ფლობენ დასაქმების ბაზარზე არსებულ სიტუაციას და იცნობენ მის მოთხოვნებს.

კიდევ ერთხელ აღვნიშნავ - ჩვენი პროფესიები ნამდვილად მოთხოვნადია. მაგალითად, როცა წამყვან კომპანიებში, საწარმოო ხაზის დაზიანების გამო, რამდენიმე დღით მექატრონიკის სპეციალისტი ჩამოჰყავთ უცხოეთიდან, მას ათეულობით ათას დოლარს უხდიან. მართალია, ქართველი სპეციალისტის შემთხვევაში ანაზღაურება განსხვავებულია, მაგრამ ნებისმიერი კომპანია დაინტერესებულია, კარგი ადგილობრივი სპეციალისტი ჰყავდეს. ამას იმიტომ ვამბობ, რომ მოთხოვნა მექატრონიკის კარგ სპეციალისტზე, გნებავთ, მექანიკის ინჟინერიის კარგ ტექნიკოსზე ნამდვილად არის და ეს შესაძლებლობა აუცილებლად უნდა გამოიყენონ ახალგაზრდებმა.   

 




Tavdacva

ყველა სიახლის ნახვა...

komentari

ყველა სიახლის ნახვა...

dRis siaxleebi

ყველა სიახლის ნახვა



arqivi


ბოლო სამი წლის განმავლობაში თქვენი პირადი შემოსავლები
გაიზარდა 85.7%
შემცირდა 11.4%
არ შეცვლილა 2.9%