„საქართველოს ახალგაზრდა იურისტთა ასოციაცია“ (საია) ზურაბ ჯაფარიძის სახელით საკონსტიტუციო სასამართლოს მიმართავს და ადმინისტრაციულ სამართალდარღვევათა კოდექსის რვა მუხლის ნორმატიული შინაარსის არაკონსტიტუციურად ცნობას მოითხოვს.
აღნიშნული მუხლებია: 32 – ადმინისტრაციული პატიმრობა; 33 – ადმინისტრაციული სამართალდარღვევისთვისსახდელის დადების ზოგადი წესი; 233- ადმინისტრაციული სამართალდარღვევის საქმის განხილვა მოქალაქეთა თანასწორობის საწყისებზე; 236 – მტკიცებულებანი; 237 – მტკიცებულებათა შეფასება; 240 – ადმინისტრაციული სამართალდარღვევის ოქმის შინაარსი; 264 – ადმინისტრაციულ სამართალდარღვევათა საქმეების განხილვისას გამოსაკვლევი გარემოებანი; 266 – ადმინისტრაციული სამართალდარღვევის საქმეზე მიღებული დადგენილება.
"გასაჩივრებული მუხლების შინაარსი, რომელიც გულისხმობს სისხლისსამართლებრივი სამართალდარღვევის განხილვასა და გადაწყვეტას სათანადო საპროცესო გარანტიების გარეშე, როგორიცაა: მტკიცების ტვირთის სწორად გადანაწილება, უტყუარი მტკიცებულებები, უდანაშაულობის პრეზუმფცია და მხარეთა თანასწორობის პრინციპი, ეწინააღმდეგება საქართველოს კონსტიტუციის 41-ე მუხლის პირველსა და მეხუთე პუნქტებს, ასევე მე-40 მუხლის მეორე და მესამე პუნქტებს", - აღნიშნავენ საია-ში.
მათი თქმით, ადმინისტრაციული სამართალდარღვევათა კოდექსი საბჭოთა პერიოდიდან შემორჩენილი ერთადერთი ნორმატიული აქტია, რომელიც დღემდე მოქმედებს და მისი გამოყენებით ყოველდღიურად არაერთი პირის უფლებები იზღუდება.