ზოგიერთი მათგანი იყო „რესპუბლიკელი“ ბოლომდე, ზოგიერთი „თავისუფალი დემოკრატი“ და ა.შ. სახელებით და გვარებით შემიძლია გადმოგცეთ ეს სია, დღეს დასახელებული არც ერთი პირი არ ყოფილა „ქართული ოცნების" წევრი, - ამის შესახებ პარლამენტის თავმჯდომარე ირაკლი კობახიძემ "ევროპული საქართველოს" ლიდერის, გიგი უგულავას გავრცელებულ ინფორმაციასთან დაკავშირებით განაცხადა, რომლის თანახმადაც, "ევროპულ საქართველოს" "ქართული ოცნების" კიდევ რამდენიმე წევრი შეუერთდა.
კობახიძის შეფასებით, ეს არის მარტივი მანიპულაცია.
„მით ცდილობს „ევროპული საქართველო“, გადაფაროს ის პროცესები, რომლებიც წარიმართება პარტიაში და თქვენ ხედავთ, რომ კონკრეტული პირები გადადიან „ევროპული საქართველოდან“ სხვა პარტიაში, პარტიას არ დავასახელებ და ხდება მანიპულაციით ამის გადაფარვა. რაც შეეხება დღევანდელ ფაქტს, აქ მაქვს კონკრეტული მონაცემები იმის თაობაზე თუ კონკრეტული პირები როდის, რომელ პარტიაში იყვნენ გაწევრიანებული. ზოგიერთი მათგანი იყო „რესპუბლიკელი“ ბოლომდე, ზოგიერთი „თავისუფალი დემოკრატი“ და ა.შ. სახელებით და გვარებით შემიძლია გადმოგცეთ ეს სია, დღეს დასახელებული არც ერთი პირი არ ყოფილა „ქართული ოცნების" წევრი. ამასთან დაკავშირებით შემიძლია მოგაწოდოთ სახელობითი ინფორმაცია. არის მარტივი მანიპულაცია, რომელთან დაკავშირებითაც ბუნებრივია, გვაქვს კონკრეტული პასუხი“, - განაცხადა ირაკლი კობახიძემ.