არ არის ადამიანი გონზეთქო არ გესმით? - ამის შესახებ "ქართული ოცნების" დეპუტატმა ვიქტორ ჯაფარიძემ პროკურატურის მიერ გავრცელებულ ჩანაწერებთან დაკავშირებით განაცხადა, სადაც ისიც ფიგურირებს.
ჯაფარიძე ამბობს, რომ ის ზაფხულში ნამდვილად შეხვდა სუბელიანს, თუმცა ეს ოჯახის წევრების მოთხოვნით მოხდა.
რუსთავი 2-თან სატელეფონო კომენტარში კითხვაზე, თუ მან ჯერ კიდევ 6 ივლისს იცოდა, რომ მირზა სუბელიანი ცრუ ბრალდებებით შეეცდებოდა ხელისუფლების წინააღმდეგ მოქმედებას, რატომ შევიდა კიდევ ორჯერ იმავე თემაზე სასაუბროდ, ის ამბობს, რომ სუბელიანი „გონზე არ იყო“ და მისი საუბარი სერიოზულად არ ჩაუთვლია.
„არ ვიცი, საპატრიარქოში ვიყავი. 6 ივლისს ვიყავი მირზა სუბელიანთან. არ არის ადამიანი გონზეთქო არ გესმით? მე არ მახსოვს როდის მითხრა, მაგრამ მითხრა.
მომისმინე, მოიხედე აქეთ, მე გითხარით თქვენ მირზა სუბელიანის ნალაპარაკები ჩემთვის იყო არასერიოზული, მასთან შევდიოდი ოჯახის მოთხოვნით, რომ არ იყო გონებაზე აშლილი იყო. შედი დაამშვიდე დააწყანარეო. კიდევ რომ, მთხოვონ კიდევ შევალ“ , - ამბობს ჯაფარიძე.
კითხვაზე, ჩააყენა საქმის კურსში თუ არა ხელისუფლების წარმომადგენლები მას შემდეგ რაც, მირზა სუბელიანი მას დაარქივებულ ვიდეო ფაილებზე ესაუბრა, რომლის საშუალებითაც „აყირავებას“ უპირებდა ხელისუფლებას, ჯაფარიძემ არ უპასუხა.
„მოიხედე შენ აქეთ, ქართული არ გესმის? ვიცოდი, რომ სისულელეებს ამბობდა და რა უნდა მეთქვა? ნუ ატრიალებ. მირზა სუბელიანის საუბარი ჩავთვალე თავიდან ბოლომდე არასერიოზულად ამიტომაც ვთქვი და გავაკეთე განცხადება თქვენს ეთერშიც. მირზა სუბელიანის საუბარი იყო წნეხის ქვეშ მყოფი ადამიანის საუბარი“, - ამბობს ჯაფარიძე.
ცნობისთვის, პროკურატურამ მირზა სუბელიანისა და ვიქტორ ჯაფარიძის საუბრის ახალი ჩანაწერი გაასაჯაროვა.