ეს არის ორგანიზებული და დანაშაულებრივი ჯგუფების მმართველობა, კორუფციით, ხელის დაფარებითა და პოლიტიკური ნეპოტიზმით გაჟღენთილი, - ამის შესახებ "ევროპული საქართველოს" ერთ-ერთმა ლიდერმა გიგა ბოკერიამ პროკურატურის მიერ გავრცელებულ ჩანაწერებთან დაკავშირებით განაცხადა.
მისი თქმით, ეს ხელისუფლება უნდა შეიცვალოს არჩევნების გზით.
„იმისდა მიუხედავად, აქვს თუ არა ადგილი პროკურატურის ან მთავრობის მხრიდან პირდაპირ მანიპულაციებს, ამ ჩანაწერებით იხატება ის უმძიმესი სურათი, სადაც ქვეყანა ლოგიკურად მივიდა ივანიშვილის გუნდის მმართველობის ქვეშ. ეს არის ორგანიზებული და დანაშაულებრივი ჯგუფების მმართველობა, კორუფციით, ხელის დაფარებითა და პოლიტიკური ნეპოტიზმით გაჟღენთილი.
ისინი მზად არიან წავიდნენ ნებისმიერ დანაშაულზე, პოლიტიკური ამოცანების შესასრულებლად. ჩანაწერების ეს ბუკეტი ამ მძიმე ვითარების დადასტურებაა. ახლა რა ჩანაწერებიც არ უნდა გამოჩნდეს, ის ვერ შეცვლის ამ მძიმე ვითარებას. ამ ხელისუფლებას არც უნარი აქვს და არც ნება, რომ იმ ჭაობიდან ქვეყანა ამოიყვანოს, სადაც თვითონ ჩავიდა. ეს ხელისუფლება უნდა შეიცვალოს არჩევნების გზით.
ჩვენი ამოცანაა რომ ეს ყველაფერი ჩარჩოებში დარჩეს, პარლამენტმა თავისი როლი შეასრულოს, მაგრამ საბოლოო ჯამში პოლიტიკური განაჩენი არ შეიცვლება - ივანიშვილს და მის გუნდს არ შეიძლება დარჩეთ ძალაუფლება. ეს უნდა მოხდეს ქართველი ხალხის მშვიდობიანი ნების გამოხატვით არჩევნებზე", - განაცხადა გიგა ბოკერიამ.