ნაძალადევის რაიონში მიმდინარე წელს მოკლული დავით ქმოსტელის საქმეს თბილისის საქალაქო სასამართლოში ნაფიცი მსაჯულები განიხილავენ.
დღევანდელ პროცესზე ბრალდების მხარის მტკიცებულებების გამოკვლევა მოხდება.
სასამართლოს ჩვენებას ერთ-ერთი დაზარალებული, გია სურამელაშვილი მისცემს. დაიკითხება ასევე ის პირი, რომელიც შემთხვევის ადგილის მიმდებარედ ცხოვრობს. ის მკვლელობის თვითმხილველია.
შეგახსენებთ, რომ თბილისში, ნაძალადევის რაიონში, 4 თებერვალს, დავით ქმოსტელი, იგივე ძივითა მოკლეს. ის მკვლელობის დღეს ნათესავთან იმყოფებოდა. სწორედ იქიდან გამოსულს ესროლეს მას.
მკვლელობიდან მეორე დღეს, სამართალდამცავებმა ლევან ყანდორელაშვილი და გიგა ჭალელიშვილი დააკავეს. დაკავებულები ბრალს არ აღიარებენ.
გამოძიების ინფორმაციით, ბრალდებულებს კონფლიქტი ჰქონდათ მოკლულთან. დაცვის მხარის ინფორმაციით კი, ეს სიმართლეს არ შეესაბამება და ბრალდებულთაგან ერთი პირი მოკლულს საერთოდ არც იცნობდა. მათივე ცნობით, ბრალდების მხარეს საქმეში მტკიცებულებები არ აქვს.