ბუნებრივია, უნდა დაისაჯოს ის, ვინც მკვლელობა ჩაიდინა და არა ის, ვისი გაწირვაც უნდათ, - აცხადებს ჟურნალისტებთან დავით ქმოსტელის მკვლელობაში ბრალდებულების ადვოკატი, სულხან კომახიძე.
აღნიშნულ საქმეს თბილისის საქალაქო სასამართლოში ნაფიცი მსაჯულები განიხილავენ.
როგორც კომახიძე განმარტავს, დღეს სასამართლოში დაკითხულმა მოწმეებმა მხოლოდ სხვისგან განაგონი ინფორმაცია გააჟღერეს და ის სასამართლომ არ უნდა გაიზიაროს.
"ამ საქმეში არც დღეს, არც ხვალ და არც ზეგ არ იქნება მნიშვნელოვანი მოწმე, რადგან ასეთი არ არსებობს. დღეს დაკითხული მოწმეებიდან ყველა ზღაპარს, განაგონ ინფორმაციას ჰყვება, რომელზეც განაჩენის დადგომა შეუძლებელია. მთელი საქმე სიმართლის ილუზიაა", -აცხადებს კომახიძე.
მისივე განმარტებით, გამოძიება ცალმხრივად მიმდინარეობდა და სხვა მნიშვნელოვან გარემოებებზე, მათ შორის, იმაზე, რომ ერთ-ერთ პიროვნებას საკმაოდ სოლიდური თანხა ჰქონდა ქმოსტელის ვალი და სწორედ, მკვლელობაც შესაძლოა, მისი ჩადენილი იყოს, გამოძიებას ამ მხრივ არ უმუშავია.
"ერთ-ერთ პირს ჰქონდა მოკლული დავით ქმოსტელის ვალი, საუბარია, უძრავი ქონების შესაძენ თანხაზე, ამ ადამიანს ბინა გაუყიდეს. არ არის გამორიცხული, მას ჰქონოდა ინტერესები, რომ დღეს დავით ქმოსტელი ცოცხალი არ ყოფილიყო. სასამართლო სხდომაზეც ითქვა, რომ ის ამ ადამიანს თანხის უკან დაბრუნებას გამუდმებით თხოვდა და ის ვერ უბრუნებდა. ამ ვერსიაზე გამოძიებას საერთოდ არ უმუშავია, ეს დეტალი არ შეუსწავლია და ცალმხრივად მიდიოდა გამოძიება.როგორც ჩანს, ვიღაცას ეს ასე აწყობდა.
მოკლულის დეიდამ დღეს პროცესზე თქვა ის, რაც გამოძიებაში არ უთქვამს და თქვა ის, რაზეც პროკურორი ელაპარაკა რამდენიმე დღის წინ, როცა მას პროცესზე ჩვენების მისაცემად ამზადებდა. პროკურორმა თავისი ვერსია მოახვია გარდაცვლილის დეიდას. როგორ შეიძლება შენი საყვარელი დისშვილის გარდაცვალების დღეს ვიღაც სამძიმარზე საუბრობდეს, რატომ მოკლეს და შენ არ იცოდე ვინ ისაუბრა?.ამიტომ ამ ადამიანის ჩვენება ყურადსაღები არაა", - აცხადებს კომახიძე.
ცნობისთვის, დავით ქმოსტელი მიმდინარე წლის 4 თებერვალს, თბილისში, ნაძალადევის რაიონში მოკლეს. მკვლელობიდან მეორე დღეს, სამართალ დამცავებმა ლევან ყანდორელაშვილი და გიგა ჭალელიშვილი დააკავეს. ისინი ჩადენილ დანაშაულს არ აღიარებენ.
