თბილისში, ნაძალადევის რაიონში მოკლული დავით ქმოსტელის საქმეზე, რომელსაც ნაფიცი მსაჯულები განიხილავენ, დღეს 4 მოწმე დაიკითხა.
როგორც საქმის პროკურორი, ლაშა ბიწაძე აცხადებს, მათ მიერ სასამართლოსთვის მიწოდებული ინფორმაციით, დადასტურდა ბრალდებულთა ბრალეულობა.
"ბრალდების მხარის 5 მოწმე დაიკითხა, მათ შორის, დაზარალებულის უფლებამონაცვლე, დაზარალებულის ნათესავი და ის პიროვნებები, რომელთა სახლშიც უშუალოდ ფაქტი მოხდა.
შესაბამისად, მოწმეებმა დაადასტურეს, რომ ბრალდებულის სკამზე მსხდომ პიროვნებებს კონფლიქტი ჰქონდათ გარდაცვლილთან და შესაბამისად, მათთვის ცნობილი ინფორმაციით დადასტურებულ იქნა, რომ ბრალდებულის სკამზე მსხდომი პიროვნებები არიან სწორედ ის პიროვნებები, რომელთა მიერაც 2018 წლის 4 თებერვალს განხორციელდა დანაშაული", -აცხადებს ბიწაძე.
პროკურორის ინფორმაციით, ბრალდებულ ყანდორელაშვილს თანხის გამო პრობლემა ჰქონდა ერთ პიროვნ3ბასთან, რომელსაც მოკლული ქმოსტელი გამოესარჩლა.
"ლევან ყანდორელაშვილს კონფლიქტი ჰქონდა ერთ-ერთ პიროვნებასთან, რის გამოც, მას გამოესარჩლა მოკლული. სწორედ, ამ გარემოებებთან დაკავშირებით მოხდა მათ შორის შელაპარაკება. დღეს დაკითხულმა მოწმეებმა სასამართლოში განაცხადეს, რომ არაერთი პირი, რომლებთანაც მათ კომუნიკაცია ჰქონდათ, ამბობდა რომ ბრალდებულების მიერ მოხდა აღნიშნული დანაშაულის ჩადენა", - აცხადებს პროკურორი და დასძენს, რომ საქმეში ბრალდებულთა ბრალის დამადასტურებელი მტკიცებულებები მრავლადაა, მათ შორის, მოწმის ჩვენებები, ექსპერტიზის დასკვნები და ფარული საგამოძიებო მოქმედების შედეგად მოპოვებული ინფორმაცია.
შეგახსენებთ, რომ თბილისში, ნაძალადევის რაიონში, 4 თებერვალს, დავით ქმოსტელი, იგივე ძივითა მოკლეს. ის მკვლელობის დღეს ნათესავთან იმყოფებოდა. სწორედ იქიდან გამოსულს ესროლეს მას.
მკვლელობიდან მეორე დღეს, სამართალდამცავებმა ლევან ყანდორელაშვილი და გიგა ჭალელიშვილი დააკავეს.
დაკავებულები ბრალს არ აღიარებენ.
გამოძიების ვერსიით, ლევან ყანდორელაშვილსა და დავით ქმოსტელს უთანხმოება ჰქონდათ და მკვლელობაც შურისძიების ნიადაგზე მოხდა.
ბრალდებულების ადვოკატი, სულხან კომახიძე კი აცხადებს, რომ ლევან ყანდორელაშვილს განყოფილებაში ნარკოტიკი მოახმარეს. მისივე თქმით, საქმეში ერთადერთი ვიდეოფირი აქვთ, სადაც ბრალდებულს ეკითხებიან, ქმოსტელი რატომ მოკლესო და ის პასუხობს, ალბათ, მოსაკლავი იყოო.
