მიმდინარე წლის ზამთრის სანავიგაციო სეზონიდან, რუმინული ავიაკომპანია “TAROM”-ი საქართველოს მიმართულებით რეგულარული საჰაერო მიმოსვლის განხორციელებას იწყებს. ბუქარესტი-თბილისი-ბუქარესტის საჰაერო ხაზზე ავიარეისები 31 ოქტომბრიდან კვირაში 2 სიხშირით, ყოველ ოთხშაბათსა და კვირას შესრულდება.
საქართველოს საავიაციო ბაზარზე შემოსვლასთან დაკავშირებით, სასტუმრო „მერკურში“ ავიაკომპანიის პრეზენტაცია გაიმართა. ღონისძიებაზე სიტყვით რუმინეთის ელჩი, სამოქალაქო ავიაციის სააგენტოს, ტურიზმის ადმინისტრაციის, „ტავ ჯორჯიას“ და ავიაკომპანია “TAROM”-ის ხელმღვანელი პირები გამოვიდნენ. მხარეთა შეფასებით, ახალი მიმართულებით პირდაპირი რეგულარული ავიამიმოსვლის დაწყება უფრო ხელმისაწვდომს გახდის მგზავრების გადაადგილებას ორი ქვეყნის დედაქალაქს შორის და ხელს შეუწყობს ტურისტების მოზიდვას საქართველოში.
„ავიაკომპანიის შემოსვლა მნიშვნელოვანია არა მხოლოდ პირდაპირი ფრენების კუთხით, არამედ იმითაც რომ ავიაკომპანია მომხმარებლებს სთავაზობს ორმოცდაათზე მეტ ტრანზიტულ მიმართულებას, რაც შეუქმნის დამატებით არჩევანს საქართველოს მოქალაქეებს სასურველ მიმართულებაზე მოსახვედრად.“- განახცხადა სამოქალაქო ავიაციის სააგენტოს დირექტორის მოადგილემ ალექსანდრე გაჩეჩილაძემ. საავიაციო მიმოსვლის კუთხით არსებული სიახლეების შეფასებისას, სააგენტოს წარმომადგენელმა აღნიშნა რომ ბაზარი წელსაც დინამიურად ვითარდება და 9 თვის მონაცემებით მგზავრთანაკადი 22%-ით არის გაზრდილი. „ზრდა განპირობებულია არა მხოლოდ უცხოური ავიაკომპანიების აქტივობით, ქართული ავიაკომპანია “Georgian Airways”-ს აქვს ათი ახალი მიმართულება და მგზავრთანაკადის 45%-იანი ზრდა 9 თვის მონაცემებით, ხოლო მეორე ქართული ავიაკომპანია “Myway Airlines”-ი ჯერ-ჯერობით ახორციელებს რეისებს კიევის, ხარკოვის და თელ-ავივის მიმართულებით, თუმცა თვის ბოლოდან ფრენებს მიუნხენის, დიუსელდორფის, ბუდაპეშტის, ათენისა და რომის მიმართულებით დაიწყებს. “TAROM”-ი არის რიგით მეშვიდე ახალი ავიაკომპანია, რომელიც მიმდინარე წელს განახორციელებს ფრენებს საქართველოს მიმართიულებით. ზამთრის სანავიგაციო სეზონზე რეგულარულ ავიამიმოსვლას სულ ორმოცი ავიაკომპანია შეასრულებს.“ - აცხადებს ალექსანდრე გაჩეჩილაძე.
ავიაკომპანია “TAROM”-ი 1954 წელს დაარსდა. 2010 წელს, რუმინეთის სახელმწიფო საკუთრებაში მყოფი ავიაგადამზიდველი “SkyTeam“-ის ალიანსის წევრი გახდა. საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს მიერ, ავიაკომპანია “TAROM“-ს რეგულარული საჰაერო მიმოსვლის განხორციელების ნებართვა 2018 წლის 7 აგვისტოს მიენიჭა.