გუშინ, "რუსთავი 2"-ის გავრცელებულ ჩანაწერებთან დაკავშირებით, საქართველოს რამდენიმე ქალაქში - ქუთაისში, გორსა და თელავში აქციები მიმდინარეობს.
„ნუ ასარდაფებ", „არ დავუშვებთ მხედრიონის დაბრუნებას", - ამ მოწოდებებით აქციის მონაწილეები ქუთაისში, მერიის შენობასთან არიან შეკრებილები.
აქციის მონაწილეები ქვეყანაში ბოლო დროს მიმდინარე მოვლენებს აპროტესტებენ.
აქციაზე იმყოფებიან გაერთიანებული ოპოზიციის წევრებიც. მათი განცხადებით, დაუშვებელია ის მდგომარეობა, რაც ქვეყანაშია.
აქცია მიმდინარეობს თელავშიც. „ნაციონალური მოძრაობის“ წევრები მირზა სუბელიანის სავარაუდო მონაწილეობით გამოქვეყნებულ აუდიოჩანაწერთან დაკავშირებით, მხარდამჭერებთან ერთად და გუბერნატორის ადმინისტრაციის შენობასთან არიან შეკრებილები.
აქცია-მსვლელობა მიმდინარეობს გორშიც.
მოქალაქეები საყვირებით, ტრანსფარანტებით და შეძახილებით „ქართული ოცნების“ გორის რაიონულ ოფისთან მივიდნენ და გუშინ გავრცელებული აუდიოჩანაწერის შინაარსი გააპროტესტეს.
მოსახლეობა ენმ-ის წარმომადგენლებთან ერთად აპროტესტებს ხელისუფლების ქმედებებს, რომელზეც აუდიოჩანაწერში, სავარაუდოდ, მირზა სუბელიანი საუბრობდა.
ცნობისთვის, რ2-ის მიერ გავრცელებული ჩანაწერი გლდანის #8 სასჯელაღსრულების დაწესებულებაშია გაკეთებული, რომელშიც სავარაუდოდ, პროკურატურის ყოფილი მაღალჩინოსანი, მირზა სუბელიანი საუბრობს. ჩანაწერის მიხედვით, სუბელიანთან საკანში იმყოფებიან „ქართული ოცნების“ დეპუტატი ვიქტორ ჯაფარიძე და ლტოლვილთა სამინისტროს ყოფილი მაღალჩინოსანი, გენერალური ინსპექციის ყოფილი თანამშრომელი დათო ცუხიშვილი.
მირზა სუბელიანთან ციხეში ვიზი დაადასტურა ვიქტორ ჯაფარიძემ.