დღეს მივიღეთ უკიდურესობა, როდესაც სახელმწიფო და სახელმწიფო ინსტიტუციები, პრაქტიკულად, ჩამოშლილია და ქვეყანა იმართება ცალკეული ადამიანების მიერ კრიმინალური, მაფიოზური მენტალიტეტის, გარჩევების, საკუთარი ბიზნეს ინტერესების გამოყენებით და მათ საფუძველზე, - ამის შესახებ „ევროპული საქართველოს“ პრეზიდენტობის კანდიდატმა დავით ბაქრაძემ „რუსთავი 2“-ის მიერ გავრცელებულ ჩანაწერებთან დაკავშრებით განაცხადა.
დავით ბაქრაძის თქმით, აუდიოჩანაწერების ავთენტურობის შემთხვევაში დასტურდება, რომ ქვეყანაში სახელმწიფო ინსტიტუციების არ მუშაობს.
„ეს სიტუაცია არის უაღრესად საგანგაშო და ეს არ არის კონკრეტული თანამდებობის პირების, უწყებების ან კონკრეტული საქმეების თემა. ეს არის თითოეული ჩვენგანის მომავლის საკითხი,“ - განაცხადა დავით ბაქრაძემ.
მისივე თქმით, აღნიშნული ჩანაწერების ავთენტურობა პროკურატურამ დღეს გაკეთებული განცხადებით არაპირდაპირ დაადასტურა, საიდანაც ირკვევა, რომ საგამოძიებო უწყებამ გამოძიება დაიწყო იმასთან დაკავშირებით, თუ ვინ გააკეთა ეს აუდიოჩანაწერი.
ცნობისთვის, რ2-ის მიერ გავრცელებული ჩანაწერი გლდანის #8 სასჯელაღსრულების დაწესებულებაშია გაკეთებული, რომელშიც სავარაუდოდ, პროკურატურის ყოფილი მაღალჩინოსანი, მირზა სუბელიანი საუბრობს. ჩანაწერის მიხედვით, სუბელიანთან საკანში იმყოფებიან „ქართული ოცნების“ დეპუტატი ვიქტორ ჯაფარიძე და ლტოლვილთა სამინისტროს ყოფილი მაღალჩინოსანი, გენერალური ინსპექციის ყოფილი თანამშრომელი დათო ცუხიშვილი.