ფსიქოლოგი ქეთი თავართქილაძე აცხადებს, რომ ბარნოვზე მოკლული 25 წლის თაკო გამრეკელაშვილის მცირეწლოვანი შვილის ფსიქიკური განვითარება იძლევა იმის შესაძლებლობას, დღეს სასამართლოში მის მიერ გაჟღერებული ინფორმაცია სარწმუნოდ ჩაითვალოს.
"კონკრეტულად რა ინფორმაცია მიაწოდა მან სასამართლოს, ამასთან დაკავშირებით ვერ ვისაუბრებ. ბავშვის ფსიქიკური განვითარების დონე არის ისეთი, მას შეუძლია აღიქვას, დაიმახსოვროს და თანმიმდევრულად გადმოსცეს ინფორმაცია. მისი ნალაპარაკები შეიძლება სარწმუნოდ და სანდოდ ჩაითვალოს", - აცხადებს ფსიქოლოგი.
მისივე განმარტებით, ბავშვის მდგომარეობა დედის მკვლელობის შემდეგ საკმაოდ მძიმე იყო, რადგან ის ამ ფაქტს შეესწრო. თავართქილაძის განმარტებით, ბავშვი ფსიქო-რეაბილიტაციის კურსს ამ დრომდე გადის.
"ბავშვის მდგომარეობა იყო მძიმე გაიარა ფსიქორეაბილიტაციის კურსი, რომელიც არ დასრულებულა და საჭიროებს გაგრძელებას. იმედს ვიტოვებ, რომ კარგად იქნება ყველაფერი.
მეორე მცირეწლოვანი ასაკის გამო ცოტა უკეთეს მდგომარეობაშია, რადგან მთლად ყველაფერი ვერ აღიქვა. მანაც გაიარა რეაბილიტაციის კურსი და შეიძლება ჩავთვალოთ, რომ დასრულდა ეს კურსი და შედეგი დადებითი გვაქვს", - დასძენს ფსიქოლოგი.