ჩოხატაური-ლანჩხუთის მაჟორიტარი დეპუტატი ნინო წილოსანი გურიაში „ქართული ოცნების“ წევრების „ევროპულ საქართველოში“ გადასვლის შესახებ გიგი უგულავას გავრცელებულ ინფორმაციას უარყოფს.
მისი თქმით, გიგი უგულავა თავის მომხრეებზე ამბობს, თითქოს, „ქართული ოცნების“ ცხრა მხარდამჭერი „ევროპულ საქართველოს“ შეუერთდა.
„გიგი უგულავას შეუძლია, თავის პარტიას ჩვენი ცხრა „მხარდამჭერი“ ასეთივე წარმატებით ხვალაც „შეუერთოს“, თუმცა „ევროპული საქართველოს“ რიგები რეალურად არც ერთი წევრით არ გაიზრდება. ამ ადამიანების ნაწილი „ქართული ოცნების“ წევრი და ჩვენი გამოკვეთილი მხარდამჭერი არასდროს ყოფილა, ნაწილი კი მსგავს ფაქტს საერთოდ უარყოფს. „ევროპული საქართველოს“ აღნიშნული განცხადება „ნაციონალური მოძრაობის“ მიერ რამდენიმე დღის წინ გაკეთებულ განცხადებას ჰგავს, სადაც ამტკიცებდნენ, რომ „ქართული ოცნების“ წევრი ოპოზიციას შეუერთდა. ორივე ოპოზიციური პარტიის სტილი დაცულია და სიცრუეს ეფუძნება“, – განუცხადა წილოსანმა საზოგადოებრივ მაუწყებელს.
ცნობისთვის, "ევროპული საქართველოს" ლიდერმა გიგი უგულავამ დღეს ლანჩხუთში ბრიფინგი გამართა, სადაც განაცხადა, რომ "ქართული ოცნების" აქტივისტები, კოორდინატორები და ზონის უფროსები სალომე ზურაბიშვილის საარჩევნო კამპანიაში მუშაობაზე უარს ამბობენ და "ევროპულ საქართველოს" უერთდებიან.