ხორავას ქუჩაზე მომხდარი მკვლელობის დაფარვაზე ბრალდებულთა სასამართლო პროცესი გადაიდო. როგორც საქმის პროკურორმა, გიორგი ქობულაძემ ჟურნალისტებთან განაცხადა, სხდომის გადადების მიზეზი გამოსაკითხი მოწმეების სასამართლო პროცესზე არ გამოცხადება გახდა.
"ბრალდების მხარეს დღეს სურდა ივანე ნაკაიძე დაეკითხა, რომელიც სხდომაზე არ გამოცხადდა.
შემდეგ პროცესზე უწყების მეშვეობით განვახორციელებთ, მის დაბარებას. ასევე, გვსურდა, დაგვეკითხა გ.ბ. მოწმის სახით. თუმცა, ის არასრულწლოვანია და მისი კანონიერი წარმომადგენლის თანდასწრებით უნდა მომხდარიყო მისი გამოკითხვა. კანონიერ წარმომადგენელს პირადი პრობლემები ჰქონდა და ვერ მოახერხა დღევანდელ პროცესზე მოსვლა", - განაცხადა ქობულაძემ.
ერთ-ერთი ბრალდებულის, გიორგი შაბულიშვილის ადვოკატი, მერაბ მამულაძე განმარტავს, რომ ბრალდების მხარემ არაერთი გასაუბრების ოქმი წარმოადგინა, რომ მათ გამოსაკითხ პირებთან დაკავშირება ვერ შეძლეს.
მამულაძის განცხადებით, დაცვის მხარე საქმის ხელოვნურად გაჭიანურებაზე ვერ ისაუბრებს, რადგან პროცესის გადადებას პირველად ჰქონდა ადგილი.
"დაველოდებით შემდეგ სხდომას, თუ კვლავ გარკვეული მიზეზებით არ მოხდა მოწმეთა გამოცხადება, სხვა ვერაფერზე ვიფიქრებთ. სასამართლოსგან ველოდებით, ერთადერთ და სწორ გადაწყვეტილებას, ეს არის გამამართლებელი განაჩენი, რადგან დარჩენილი მოწმეებიც ვერ დაადასტურებენ ბრალდების პოზიციებს", - აცხადებს მერაბ მამულაძე.
შემდეგი სასამართლო პროცესი, 16 ნოემბერს, 12:00 საათზე ბრალდების მხარის მოწმეების გამოკითხვით გაგრძელდება. აღნიშნულ საქმეზე ბრალდების მხარეს 4 მოწმე და 4 ბრალდებული ჰყავს გამოსაკითხი.
