სტრატეგიული კომუნიკაციების ფორუმზე სოფიო ქაცარავამ აუდიტორიას მიმართა და სამ ძირითად საკითხზე გაამახვილა ყურადღება, რაც სტრატეგიული კომუნიკაციების მნიშვნელობას, პარლამენტის როლს მის განხორციელებაში და სამიზნე აუდიტორიის განსაზღვრას მოიცავს.
"მნიშვნელოვანია ვიყოთ თანმიმდევრულები სტრატეგიული კომუნიკაციების განხორციელების დროს ჩვენს მოქალაქეებთან და საერთაშორისო დონეზე, კოორდინირებული გავხადოთ მიდგომა, გამოვიყენოთ ეფექტური გზები და ყველა ის რესურსი, რაც განკუთვნილია ამ სფეროსთვის. მზარდი ანტიდასავლური პროპაგანდის ფონზე მკაფიო გავხადოთ კავშირი შიდა რეფორმებსა და საგარეო პოლიტიკას შორის.
სტრატეგიული კომუნიკაცია ქართულ კონტექსტში არ არის მხოლოდ ბრძოლა ჰიბრიდულ საფრთხეებთან, ის ბევრად მრავლისმომცველია.
აღმასრულებელი და საკანონმდებლო ხელისუფლების, სამოქალაქო საზოგადოების და მედიის ერთობლივი ძალისხმევით უნდა შეიქმნას პოზიტიური, პროაქტიული და ძლიერი ქართული ნარატივი, რაც ეფექტურს გახდის სტრატეგიულ კომუნიკაციებს ქვეყენაში.
ახალი კონსტიტუციით საქართველო სრულად გადადის საპარლამენტო რესპუბლიკის სისტემაზე, რაც შესაბამისად მისი ფუნქციების გამოყენების მაქსიმალურ შესაძლებლობას იძლევა და პარლამენტის ჩართულობა მეტ ანგარიშვალდებულებას და გამჭვირვალობას შემატებს ამ პროცესს.
სისტემური ფორმატი და რეგულარული დიალოგი ჩვენს შორის შეთანხმებულ და კოორდინირებულ გზავნილებს შექმნის, რაც ნდობის გარანტია იქნება.
სტრატეგიული კომუნიკაციები ხელს უწყობს ძლიერი დემოკრატიული კულტურის კონსოლიდაციას და საქართველოს ნატოსა და ევროკავშირში ინტეგრირების გზაზე მიღწეული პროგრესის და გატარებული რეფორმების უკეთ წარმოჩენას.
მინდა მადლობა ვუთხრა აშშ-ს და დიდი ბრიტანეთის საელჩოებს თბილისში, USAID-ს და აღმოსავლეთ-დასავლეთ მართვის ინსტიტუტს მხარდაჭერისა და გაწეული სამსახურისთვის", - განაცხადა სოფიო ქაცარავამ.