ჩვენ არ გვინდა, რომ მივიღოთ კანონი ისე, რომ მის გარშემო არ არსებობდეს საზოგადოებრივი კონსენსუსი, – ამის შესახებ პარლამენტის ვიცე-სპიკერმა, თამარ ჩუგოშვილმა მარიხუანას კულტივაციის კანონთან დაკავშირებით განაცხადა.
მისი თქმით, კანონპროექტის განხილვა შეჩერებულია.
„კანონპროექტის განხილვა არის შეჩერებული, როგორც ჩვენ საზოგადოებას ვუთხარით, ვინაიდან კანონპროექტის ამ ნაწილმა გამოიწვია ვნებათაღელვა, აზრთა სხვადასხვაობა. ჩვენ არ გვინდა, რომ მივიღოთ კანონი ისე, რომ მის გარშემო არ არსებობდეს საზოგადოებრივი კონსენსუსი. შესაბამისად, განხილვა არის გაჩერებული“, – განაცხადა ჩუგოშვილმა.
რაც შეეხება კანონპროექტის გაწვევას, თამარ ჩუგოშვილის განცხადებით, მას უჭირს კონკრეტული პასუხის გაცემა. მისივე თქმით, მათ სჭირდებათ დამატებითი კონსულტაციების გავლა დაინტერესებულ მხარეებთან.