საქართველოში ცხოველთა ორთაბრძოლები კანონით აიკრძალება, ამის შესახებ ინფორმაციას საზოგადოებრივი მაუწყებელი ავრცელებს.
„შინაურ ბინადარ ცხოველთა კეთილდღეობის შესახებ“ კანონში შედის ცვლილებები, რომლის ინიცირება საშემოდგომო სესიაზე იგეგმება.
ცვლილებების ინიციატორი გარემოს დაცვის კომიტეტი იქნება.
კანონპროექტში ნათქვამია, რომ დაუშვებელია ცხოველთა ორთაბრძოლების ორგანიზება, ჩატარება და პროპაგანდა.
ინიციატივის გათვალისწინებით, ასევე აკრძალულია თუ პირი:
ცდილობს მოაწყოს ან აწყობს ცხოველთა ორთაბრძოლებს;
შეგნებულად იღებს ფულს ცხოველთა ორთაბრძოლაზე დაშვების მიზნით და ავრცელებს ინფორმაციას ცხოველთა ორთაბრძოლების გამართვის შესახებ;
წვრთნის და ამზადებს ცხოველებს ორთაბრძოლაში მონაწილეობისათვის;
იყენებს ან სხვას რთავს ნებას, თავის საკუთრებაში ან სარგებლობაში არსებული შენობა-ნაგებობა გამოიყენოს ორთაბრძოლების მოსაწყობად;
შეგნებულად იღებს და ავრცელებს ცხოველთა ორთაბრძოლის ვიდეო და ფოტო გამოსახულებებს ან ინახავს მათ, შემდგომში მათი გავრცელების მიზნით.
თუ პარლამენტი აღნიშნულ კანონპროექტს დაამტკიცებს, ცვლილებები 2019 წლის პირველი იანვრიდან ამოქმედდება.