ბარნოვზე, 25 წლის თაკო გამრეკელაშვილის მკვლელობის საქმეში ბრალდებული მამინაცვლის, ვეფხია ბაქრაძის ადვოკატი, ფრიდონ მაგრაქველიძე აცხადებს, რომ მოკლულ ქალს სასიკვდილო ჭრილობა მხოლოდ ორი ჰქონდა. "ექსპერტმა თქვა, გამრეკელაშვილს 20 ჭრილობა ჰქონდა, საიდანაც მხოლოდ 2 გამოიწვევდა ამ მძიმე შედეგსო. დანარჩენი სიცოცხლისათვის საშიში არ იყო, მსუბუქის ხარისხის დაზიანებები იყო. მხოლოდ და მხოლოდ ყელის არეში არსებული 2 ჭრილობა გამოიწვევდა სიკვდილსო", - აცხადებს მაგრაქველიძე. მისივე განმარტებით, ვეფხია ბაქრაძია გაღიზიანება მოკლულის ქმედებამ გამოიწვია. "იმ ოჯახში, სადაც ეს შემთხვევა მოხდა, ვეფხია ბაქრაძე ცხოვრობდა, ჩვეულებრივად დადიოდა, ნივთები იქ ჰქონდა, ამ ქალბატონმა კი კარი არ გაუღო, რაზეც ბაქრაძე გაღიზიანდა. ბოლოს თვითონ გააღო კარი, გარკვეული დროის შემდეგ, მასთან გარდაცვლილი ქალი შევიდა, ეჩხუბა, დანა აიღო, ამ ძიძგილაობაში ვეფხიამ გამოართვა დანა. ამის შემდეგ რა მოხდა, მას არ ახსოვს", - აცხადებს მაგრაქველიძე.
ცნობისთვის, თაკო გამრეკელაშვილი მიმდინარე წლის 13 აპრილს, თბილისში, ბარნოვის ქუჩაზე მოკლეს. მას ყელი ჰქონდა გამოჭრილი. აღნიშნულ დანაშაულზე სამართალდამცავებმა მოკლულის მამინაცვალი, ვეფხია ბაქრაძე 14 აპრილს, თელეთში დააკავეს. ის მიმალვაში იმყოფებოდა. გამოძიება 11 პრიმა 109-ე მუხლით მიმდინარეობს, რაც ოჯახში ძალადობის ნიადაგზე ჩადენილ განზრახ მკვლელობას დამამძიმებელ გარემოებაში გულისხმობს. აღნიშნული მუხლი 16-დან 20 წლამდე ან უვადო პატიმრობას ითვალისწინებს. სამართალდამცველებმა ბარნოვის ქუჩაზე მომხდარი მკვლელობის საქმეზე კიდევ ერთი პირი, ბრალდებულ ვეფხია ბაქრაძის ბიძაშვილი, თემურ ბაქრაძე დაკავეს. მას ბრალი დანაშაულის შეუტყობინებლობისსთვის აქვს წაყენებული. ჩადენილი დანაშაული 2-დან 4 წლამდე ვადით თავისუფლების აღკვეთას ითვალისწინებს.
