მოწმემ თქვა ისიც, რომ მივიდა შემთხვევის ადგილზე რამდენიმე წუთში და ნახა იარაღის ამოღება, დაადასტურა, რომ იქ არანაირი სცენები არ დადგმულა, - ამის შესახებ ჟურნალისტებთან ბრალდებულმა გურამ დონაძემ განაცხადა.
როგორც ის განმარტავს, დღეს გამოკითხული ყოფილი პატრულ-ინსპექტორი ბრალდების მხარემ 6 წლის განმავლობაში სასამართლოში არ მოიყვანა.
"დავით გიგაშვილი არის პროკურატურის მოწმე, რომელიც სახელმწიფო ბრალდებამ 6 წლის განმავლობაში არ მოიყვანა სასამართლოში და მოვიყვანეთ ჩვენ. გამოძიებისთვის მიცემულ ჩვენებაში გიგაშვილმა დაწერა, რომ შემთხვევის ადგილზე ნახა იარაღები და არსად მის ჩვენებაში არ წერია სიტყვა "ორი ავტომატი". მან ნახა ავტომატი მგზავრის წინა მხარეს და ნახა საბარგულზეც. თუ აქ სადმე სიტყვა ორს იპოვით პასუხისმგებელი ვარ ყველაფერზე", - აცხადებს დონაძე.
როგორც ის განმარტავს, დღეს გამოკითხულმა ექსპერტმა დაადასტურა, რომ ვიდეოჩანაწერში მონტაჟი არ არის.
"ასევე ლევან სამხარაულის სახელობის ექსპერტიზის ბიუროს ექსპერტმა დაადასტურა, რომ ჩვენს მიერ გადაცემულ კადრებში არ არის მონტაჟი, არ არის წყვეტა, არ არის ხარვეზი, არ არის სპეცეფექტები გასროლიდან იარაღების პოვნამდე მონაკვეთში და მეორე მონაკვეთში, სადაც ბუტა რობაქიძე დაჭრილია და პატრულებს დააქვთ იარაღები. ბოლოს ექსპერტმა ასევე თქვა, რომ 2018 წლის პროგრამაც, 2013 წლისაც, 2004-საც და 2020-საც, ყველა ერთნაირად პოულობს კადრის წყვეტას და მონტაჟს. განსხვავება არის მხოლოდ ის, რომ დამატებითი დეტალების პოვნაა შესაძლებელი", - აცხადებს დონაძე.
ცნობისთვის, ბუტა რობაქიძის მკვლელობის საქმეზე შინაგან საქმეთა სამინისტროს ყოფილი მაღალჩინოსნების მხრიდან სამსახურეობრივი უფლებამოსილების გადამეტების
საქმეზე ბრალდებულია 6 პირი: გურამ დონაძე, ზაზა ბაქრაძე, ზურა მიქაძე, ლევან გვაზავა, ირაკლი ფირცხალავა და დავით იაშვილი არიან ბრალდებული.
ერთ-ერთი ბრალდებული, კრიმინალური პოლიციის ყოფილი უფროსი, ზაზა ბაქრაძე, რომელიც თბილისის საერთაშორისო აეროპორტში 28 თებერვალს დააკავეს, 30 მარტს, 5 000 ლარიანი გირაოს სანაცვლოდ სხდომათა დარბაზიდან გაათავისუფლეს.