ქუთაისის N2 საჯარო სკოლაში ბულინგის შესაძლო ფაქტების შესახებ ინფორმაციის მიღებისთანავე, მათი გამოძიების დავალება გაიცა, - ამის შესახებ განათლების მინისტრმა მიხეილ ბატიაშვილმა განაცხადა.
მისი თქმით, ბულინგის შემთხვევებს დიდი ყურადღება მიექცევა და ამ მიმართულებით, კონკრეტული ნაბიჯებიც გადაიდგმება. მისივე თქმით, ბულინგი მიუღებელია, როგორც სკოლის პედაგოგებისგან, ისე ადმინისტრაციული პერსონალისგან.
„ზოგადად, ვფიქრობთ, რომ ბულინგი მიუღებელია, როგორც სკოლის პედაგოგებისგან, ისე ადმინისტრაციული პერსონალისგან და სამინისტროს მხრიდან ამაზე ძალიან მნიშვნელოვანი ყურადღება მიექცევა, კონკრეტული ნაბიჯებიც გადაიდგმება. ჩვენი მხრიდან, შეგვიძლია განვაცხადოთ, რომ ეს სკოლაში არის მიუღებელი და ასეთი ფაქტები არ უნდა ხდებოდეს“, – განაცხადა ბატიაშვილმა.
ცნობისთვის, საქართველოს განათლების, მეცნიერების, კულტურისა და სპორტის სამინისტროს შიდა აუდიტის დეპარტამენტმა, ქუთაისის იოსებ ოცხელის სახელობის N2 საჯარო სკოლაში მასწავლებლის მხრიდან მოსწავლეზე განხორცილებული შესაძლო ბულინგის ფაქტთან დაკავშირებით მოკვლევა დაიწყო. შეგახსენებთ, სოციალურ ქსელში ამავე სკოლის მოსწავლის მშობელმა გაავრცელა ინფორმაცია, რომ მისი მეხუთეკლასელი შვილის მიმართ მასწავლებელმა ვერბალური ბულინგი განახორციელა.
მისივე ინფორმაციით, რახან მისი შვილი მოგრძო თმას ატარებს, მასწავლებელმა მისი ბიჭის მისამართით კლასს საჯაროდ დაუსვა კითხვა იმის გასარკვევად, ახალი მოსწავლე გოგო იყო თუ ბიჭი.