დანიშნული მაქვს ექსპერტიზა, რომლის დასკვნასაც სასამართლოზე წარმოვადგენ. ამ ექსპერტიზით პასუხი გაეცემა კითხვას, კონკრეტულად ამ დანით არის თუ არა განხორციელებული მიყენებული ჭრილობები და კანის ელასტიურობის გათვალისწინებით, პარამეტრები შეიძლება ემთხვეოდეს თუ არა დანას, - განაცხადა ჟურნალისტებთან თემქაზე ანა ნაცვლიშვილის მკვლელობაში ბრალდებული ლადო გრიგალაშვილის ადვოკატმა, ნაირა ოტიაშვილმა.
მიუხედავად იმისა, რომ სასამართლოში დღეს გამოკითხულმა ექსპერტ-კრიმინალისტმა განმარტა, რომ დასკვნა დანასთან მიმართებაში კატეგორიული ვერ იქნებოდა, ადვოკატი აცხადებს, რომ ექსპერტს თავის დასკვნაში მთავარ კითხვებზე პასუხის გაცემა შეეძლო.
"ექსპერტების დასკვნა არის საალბათო, ვინაიდან ექსპერტები ამბობენ, შესაძლებელია ამ დანით, ან მსგავსი დანით, ან სხვა საგნით იყოს მიყენებული ჭრილობაო.
ჭრილობის ზომები დანის პარამეტრებთან და ზომებთან, არ იქნა შედარებული. იმ შემთხვევაში, თუკი, დანის პარამეტრები შედარდებოდა არსებულ ჭრილობებს, შესაძლებელი იყო ყველაფრის დადგენა. იმ შემთხვევაში, როცა კატეგორიული დასკვნა არ არის, ეს ბრალდებულის სასარგებლოდ განიხილება", - აცხადებს ოტიაშვილი.
მისი განმარტებით, ბრალდებულის ავტოფარეხიდან ამოღებულ ნივთებზე ანა ნაცვლიშვილის დნმ-ის აღმოჩენა გასაკვირი არ უნდა იყოს, რადგან ის გრიგალაშვილის საცოლე იყო.
"გენეტიკური პროფილი შესაძლოა აღმოჩნდეს, როგორც ლადო გრიგალაშვილის, ასევე ანა ნაცვლიშვილის, რადგან ის ლადოს საცოლე იყო და ახლო ურთიერთობა ჰქონდათ.
ავტოფარეხში აღმოჩენილი ბიოლოგიური მასალა არ აღმოჩნდა სისხლი, ამას ექსპერტის დასკვნა ადასტურებს", - აცხადებს ადვოკატი.
შემდეგი სასამართლო პროცესი 18 სექტემბერს, 11:00 საათზე ჩაინიშნა.