ბუტა რობაქიძის დედა, ია მეტრეველი აცხადებს, რომ სასამართლოში დღეს გამოკითხული მოწმე, ყოფილი პატრულ-ინსპექტორი, ლევან ლობჯანიძე სასამართლოში მიცემული ცრუ ჩვენების გამო, დასაკავებელია. ის ასევე მოითხოვს ყველა იმ პირის დაკავებას და დასჯას, რომელსაც მისი შვილის მკვლელობის საქმეში წვლილი მიუძღვის.
"ეს იყო ის მოწმე, რომელიც ბაშალეიშვილთან ერთად იმყოფებოდა მანქანაში, მას სამჯერ აქვს ჩვენება შეცვლილი. ეს ადამიანი აბსოლუტურად სიცრუეს ლაპარაკობდა. მან კარგად აჩვენა მაშინდელი ზონდერი პოლიციელების სახე. ამ განცხადებას იმიტომ ვაკეთებ, მინდა ეს ყველაფერი ბატონი გიორგი გახარიას ყურამდე მივიდეს. ეს მოწმე არის დასაჭერი და ალბათ, პროკურატურა მასზე საქმეს აღძრავს. დანარჩენი პატრულები, რომლებიც არ არიან დაკავებული, განაგრძობენ უწყებებში მუშაობას, ბევრი მათგანი დაწინაურებულია, ისინი კადრებშიც ძალიან კარგად ჩანან თუ როგორი განსაკუთრებული სისასტიკით გამოირჩეოდნენ უდანაშაულო ახალგაზრდების მიმართ. მოვითხოვ, შინაგან საქმეთა სამინისტრომ მოახდინოს რეაგირება და აღძრას საქმე იმ პატრულებზე, რომელთაც განსაკუთრებით სასტიკი დანაშაული აქვთ ჩადენილი ჩემი შვილის და ახალგაზრდების მიმართ. ოფიციალურად მივმართავ და შევიტან შინაგან საქმეთა სამინისტროში განცხადებას, რომ ამ პირებზე საქმე აღიძრას", - განაცხადა მეტრეველმა.
შემდეგი სასამართლო პროცესი 17 სექტემბერს, 11:00 საათზე ჩაინიშნა. აღნიშნულ დღეს, კვლავ დაცვის მხარის მტკიცებულებების გამოკვლევა მოხდება.