მოვდივარ ქაჯების დასათხოვნად, იმიტომ რომ ბოღმა, ტყუილი სიძულვილი, ეს ყველაფერი უკვე ყელში ამოვიდადა, - ამის შესახებ პრეზიდენტობის დამოუკიდებელმა კანდიდატმა სალომე ზურაბიშვილმა ქუთაისში, ამომრჩეველთან შეხვედრაზე განაცხადა.
მისი თქმით, ის ასევე მოდის, რათა ხელახლა გაიყვანს რუსული ჯარები.
„პირველ რიგში, მოვდივარ ქვეყნის დამოუკიდებლობის დასაცავად და რომ ხელახლა არავის მოუწიოს ქვეყნიდან დევნილად წასვლა, რომ აღარასოდეს აღარ დავკარგოთ ტერიტორიები და ღმერთმა იცის, რომ ამ ბოლო ორ საუკუნეში ყველა მიმართულებით დავკარგეთ ტერიტორიები. ეს არის ძალიან იშვიათი მოვლენა და მართლაც, გვინდა ამ ტერიტორიების, ამ საზღვრების შენარჩუნება და გამთლიანება, როგორიც იყო.
ასევე, მოვდივარ იმისთვის, რომ ხელახლა რუსული ჯარები გავიყვანოთ სამუდამოდ ამ ტერიტორიიდან და ამ ქვეყნიდან მშვიდობიანი გზით. მოვდივარ ქაჯების დასათხოვნად, იმიტომ რომ ბოღმა, ტყუილი სიძულვილი, ეს ყველაფერი უკვე ყელში ამოვიდა. ჩემამდე ბევრად უფრო ლამაზად შოთა ამბობდა, რომ „სიცრუე და ორპირობა ავნებს ხორცსა, მერმე სულსა“ და ჩვენ ვართ ამ მდგომარეობაში, რომ შეიძლება, ძალიან მალე სულს ავნოს ამდენმა სიძულვილმა, რომელიც ქვეყანაში ტრიალებს, ქმნის რაღაც შავ აურას და ამას ვხედავთ, მერე გადადის ახალგაზრდებზე, და ეს უთუოდ უნდა ავიცილოთ თავიდან და მე კი არ ვარ რაღაც სასწაული ჯოხის მომტანი, ამაზე ერთად უნდა ვიმუშაოთ თქვენ, მე, მედიამ, რომელსაც დიდი როლი აქვს ამ სიტუაციაში, რომ რაღაცნაირად გამოვასწოროთ. ცხადია, ეს იწყება ჯერ ოჯახში და მერე სკოლაში“, - განაცხადა სალომე ზურაბიშვილმა, რომელმაც აქვე აღნიშნა, რომ საქართველო ნამდვილად 21-ე საუკუნეში უნდა გადავიდეს.
„მოვდივარ იმისთვის, რომ მრავალფეროვანი და მრავალწლიანი საერთაშორისო გამოცდილება მოვახმარო ამ ქვეყანას მის წინაშე არსებული გამოწვევების დაძლევაში. ჩვენ ერთად უნდა გადავიდეთ ნამდვილად 21-ე საუკუნეში, ჩვენ ჯერ კიდევ ვართ სადღაც შუაში გაჩხერილი. გლობალურ მსოფლიოში, რომლისაც არ უნდა გვეშინოდეს, საკუთარი მნიშვნელოვანი ადგილი უნდა დავიმკვიდროთ ისე, რომ საკუთარი იდენტობა არ დავკარგოთ და პირიქით, გავაძლიეროთ. ეს არის რთული ამოცანა, მაგრამ ამას ერთად ნამდვილად მივაღწევთ“, - დასძინა სალომე ზურაბიშვილმა.