გერმანიის კანცლერი ანგელა მერკელი საქართველოში რუსეთის პრეზიდენტთან, ვლადიმერ პუტინთან შეხვედრის შემდეგ ჩამოდის და ეს ძალიან მნიშვნელოვანი გზავნილია, – ამის შესახებ საპარალამენტო უმრავლესობის წევრმა, დიმიტრი ცქიტიშვილმა განაცხადა.
მისი თქმით, გერმანიის კანცლერი დიდი ხანია არ ყოფილა საქართველოში და ეს არის კონკრეტული მხარდაჭერის სიგნალი, როგორც ჩვენი მოსახლეობისთვის, ასევე საერთაშორისო ასპარეზზე. მისივე განცხადებით, კონკრეტული გზავნილია, რომ გერმანია მხარს უჭერს საქართველოს და მზად არის თანამშრომლობისთვის.
ცქიტიშვილის ინფორმაციით, ვიზიტის ფარგლებში შეხვედრებზე განსახილველი მთავარი თემა საქართველოს ტერიტორიული მთლიანობა, სუვერენიტეტი, გამოწვევები, რუსეთის მიერ ოკუპირებული ტერიტორიები იქნება.
„ასევე, ძალიან დიდი ყურადღება დაეთმობა ეკონომიკური თანამშრომლობის საკითხებს, რადგან გერმანიას ერთ-ერთი ყველაზე ძლიერი ეკონომიკა აქვს მსოფლიოში და აქვს ძალიან დიდი გავლენა. ტრადიციულად, გერმანია მხარს უჭერდა საქართველოს და ეკონომიკაში ჩართული იყო. აღნიშნული შესაძლებლობა მაქსიმალურად უნდა გამოვიყენოთ“, – განაცხადა მან.
ცნობისთვის, ანგელა მერკელი საქართველოს ოფიციალური ვიზიტით 23 აგვისტოს ეწვევა.