საქართველოს საგარეო საქმეთა სამინისტროს ინფორმაციით, თბილისის საერთაშორისო აეროპორტში, უსაფრთხოების ზომებიდან გამომდინარე გადამოწმების პროცედურებზე ირანის მოქალაქეთა მიმართ მართლსაწინააღმდეგო, მათ შორის რელიგიური გრძნობების შემლახავი რაიმე ქმედება არ დასტურდება.
უწყების ინფორმაციით, აღნიშნულ საკითხთან დაკავშირებით გაიმართება შეხვედრა ირანის ელჩთან.
“ქართული მხარისთვის ირანის დიპლომატიური არხებით ცნობილი გახდა, რომ თბილისის საერთაშორისო აეროპორტში, უსაფრთხოების ზომებიდან გამომდინარე გადამოწმების პროცედურებზე ირანის მოქალაქეთა ნაწილი უკმაყოფილებას გამოთქვამს.
ინფორმაციის მიღებისთანავე საქართველოს შინაგან საქმეთა სამინისტროს შესაბამისმა სამსახურებმა დაუყოვნებლივ დაიწყეს აეროპორტში საავიაციო უსაფრთხოების ოფიცერთა მიერ მგზავრთა გადამოწმების პროცედურების შესწავლა.
პირველადი მონაცემებით და გატარებული ოპერატიული ღონისძიებებით, ქართველი სამართალდამცველების მხრიდან მართლსაწინააღმდეგო, მათ შორის რელიგიური გრძნობების შემლახავი რაიმე ქმედება არ გამოვლენილა. აღნიშნულის შესახებ ირანის მხარეს უკვე ეცნობა.
საგარეო საქმეთა სამინისტროში ჩანიშნულია შეხვედრა ირანის ელჩთან სადაც კიდევ ერთხელ გავივლით აღნიშნულ საკითხს“, - აღნიშნავენ უწყებაში.
ცნობისთვის, ირანის ისლამური რესპუბლიკა გამოთქვამს პროტესტს იმ პრობლემებთან დაკავშირებით, რასაც ირანის ზოგიერთი მოქალაქე თბილისის საერთაშორისო აეროპორტში აწყდება.
ირანის საგარეო საქმეთა სამინისტროს პრესმდივანმა ბახრამ კასემიმ აეროპორტის უსაფრთხოების სამსახურის მიერ თავსაბურავთან „უპატივცემულო დამოკიდებულებასთან“ დაკავშირებით განცხადება გააკეთა. საუბარია საპასპორტო კონტროლის გავლისას ჰიჯაბის მოხსნაზე.
თბილისში ირანის საელჩომ საქართველოს საგარეო საქმეთა სამინისტროს საპროტესტო ნოტა უკვე გაუგზავნა, ხოლო საქართველოს საელჩოს თეირანში აღნიშნულ ქმედებებზე განმარტება მოსთხოვეს.
