ყოფილი სასტუმრო „ლეოგრანდის“ ადვოკატის, კახაბერ წერეთელის განცხადებით, სასტუმრო 18:00 საათზე მუშაობას შეაჩერებს.
მისი თქმით, როდესაც ყველაფერი მოწესრიგდება, სასტუმრო გაიხსნება.
„აჭარის მთავრობის ჩართულობით, უშუალოდ საგანგებო სიტუაციების მართვის სამსახურის მიერ მოხერხდა სტუმრების გადანაწილება, მოიძებნა შესაბამისი დონის სასტუმროებში ადგილები და ადმინისტრაცია ამ ვადაში ჩაეტია, დღეს 18:00 საათზე გადაწყვეტილება იქნება შესრულებული. კონკრეტულ ვადებზე საუბარს თავს ავარიდებ, ერთი რამ ცხადია, რომ ყველას ინტერესია, ეს რაც შეიძლება მალე მოხდეს.
ყველაფერი რომ მოწესრიგდება, შემდეგ გაიხსნება სასტუმრო. რაც შეეხება უკვე მიღებულ ჯავშნებს, საკითხი მოგვარდება ისე, რომ არ დაზარალდნენ სტუმრები. ის პირობა, რაც ითქვა, ძალაში რჩება, ვინაიდან თავად სასტუმროს მენეჯმენტიც დაინტერესებულია კადრების შენარჩუნებით. არ არის იოლი კარგი კოლექტივის შექმნა და ამას შენარჩუნება სჭირდება, ბუნებრივია, შესაბამისი ნაბიჯების გადადგმით და ეს ნაბიჯები გადაიდგმება“, – განაცხადა კახაბერ წერეთელმა.
შეგახსენებთ, საგანგებო სიტუაციების მართვის სამსახურმა ყოფილი სასტუმრო „ლეოგრანდის“ (სასტუმრო „ველმონდის“) ადმინისტრაციას 17 აგვისტოს 18:00 საათამდე მისცა ვადა, შენობიდან გაიყვანოს სტუმრები და საქმიანობა შეწყვიტოს.
