პრეზიდენტის სასახლესთან დაკავშირებით პოლემიკა უნდა დასრულდეს, - ამის შესახებ პარლამენტის იურიდიულ საკითხთა კომიტეტის თავმჯდომარე ეკა ბესელიამ განაცხადა.
მისი თქმით, ამ თემაზე „ქართულმა ოცნებამ“ დებატები დიდი ხნის წინ დაასრულა.
„თემები დაილია და სხვა თემები არ არის? ამ თემაზე „ქართულმა ოცნებამ“ დებატები დიდი ხნის წინ დაასრულა. ვინც საპრეზიდენტო კამპანიის წარმართვას ამ თემით ცდილობს, მისთვის მთლად მომგებიანი არ უნდა იყოს. ეს პოლემიკა უნდა დასრულდეს, რადგან ქვეყანაში ბევრი სხვა პრობლემა და გამოწვევა არსებობს, ამაზე საუბარი კი ცოტა უხერხულია. სასახლის სიბრჭყვიალითა და სიმდიდრით არ გაიზომება არც დამოკიდებულება, არც უფლებამოსილება და არც მანდატი. ამ სასახლესთან დაკავშირებული ემოციები, სენტიმენტები და გრძნობები მათთვის უნდა დავტოვოთ, ვისაც ასეთი ემოცია აქვს. ეს არის ქვეყანა, სადაც მნიშვნელოვანია პატივისცემა ინსტიტუტების მიმართ და არ მგონია, აქცენტი ფუფუნებაზე, ნივთებსა და შენობებზე უნდა იყოს გადატანილი“, – განაცხადა ბესელიამ.