საქართველოს ეკონომიკისა და მდგრადი განვითარების სამინისტროს შპს „საქაერონავიგაციამ“ ჩეხური კომპანია „ERA”-სგან ოთხი თანამედროვე ADS-B სისტემა შეიძინა, რომელიც აღმოსავლეთ საქართველოში, კერძოდ თბილისში, გუდაურში, ბაკურიანსა და წნორში დამონტაჟდა. აღნიშნული სისტემები 2014-2015 წლიდან უკვე ფუნქციონირებს ბათუმში, ფოთსა და ქუთაისში.
„საქართველოს საჰაერო სივრცეში ფრენების ზრდის პროგნოზირებული ტენდენციისა და საერთაშორისო ორგანიზაცია ევროკონტროლისგან მიღებული რეკომენდაციების გათვალისწინებით, მივიღეთ გადაწყვეტილება, კიდევ უფრო მეტად განვავითაროთ რადიოსალოკაციო ქსელი საქართველოს მასშტაბით. აქედან გამომიდნიარე, გავაფორმეთ ხელშეკრულება ღია ელექტრონულ ტენდერში გამარჯვებულ ჩეხურ კოპმპანია „ERA“-სთან, რომელმაც დათქმულ ვადებში, აღმოსავლეთ საქართველოში თანამგზავრზე დამოკიდებული ADS-B სისტემები დაამონტაჟა. აღნიშნული სისტემები უზრუნველყოფს საჰაერო ხომალდების უფრო ზუსტ რადიოსალოკაციო ინფორმაციის მოწოდებას, ვიდრე ეს მეორადი გადაფარვის რადიოსალოკაციო სადგურებს შეუძლია. მაგალითად, თუკი მეორადი გადაფარვის რადიოლოკატორი ინფორმაციას 5 წამში ერთხელ ანახლებს, ADS-B სისტემის შემთხვევაში ინფრომაციის განახლება 1 წამში ერთხელ ხდება. ეს სისტემები ზუსტი და სრულყოფილი რადიოსალოკაციო ინფორმაციის უწყვეტ მოწოდებას უზრუნველყოფს, რაც მნიშვნელოვნად წინგადადგმული ნაბიჯია ფრენის უსაფრთხოების დონის ასამაღლებლად.“ - განაცხადა შპს „საქაერონავიგაციის“ გენერალურმა დირექტორმა გოჩა მეზვრიშვილმა.
ამავე პროექტის ფარგლებში ჩეხური კომპანიისაგან შპს „საქაერონავიგაციამ“ შეიძინა დაკვირვების სენსორებდან მიღებული ინფორმაციის დამუშავების ორი (დარეზერვებული) სერვერი, რომლებიც განთავსდა თბილისის და ქუთაისის საჰაერო მოძრაობის მართვის ცენტრებში. აღნიშნული სერვერები სამომავლოდ მოიაზრება, როგორც ერთიანი რადიოლოკაციური ქსელის ძირითადი ნაწილი.
ზემოთ აღნიშნული ტექნიკური საშუალებების კომპლექსი სრულ შესაბამისობაშია საჰაერო მოძრაობის მართვის ახალ ავტომატიზირებულ სისტემასთან (INDRA). ასევე, შემოწმებულია მიწოდებული ინფორმაციის მაღალი საიმედოობა და ხარისხი.
