ნებისმიერი ინიციატივა უნდა გამოვიყენოთ იმისთვის, რათა აფხაზებსაც და ოსებს დავანახოთ, რომ ჩვენ არ ვართ მტრები, - ამის შესახებ „ევროპული საქართველოს“ პრეზიდენტობის კანდიდატმა დავით ბაქრაძემ ოკუპირებული აფხაზეთის ყოფილი ე.წ. პრემიერ-მინისტრ სერგეი შამბას განცხადებასთან დაკავშირებით აღნიშნა.
მისი თქმით, ჩვენ გვაქვს საერთო ინტერესები და აფხაზების და ოსების ინტერესი ყველაზე უკეთ იქნება დაცული ერთიან ქართულ სახელმწიფოში.
„შამბას ინიციატივა არის ძალიან მნიშვნელოვანი და ჩვენ უნდა გამოვიყენოთ ნებისმიერი ასეთი ინიციატივა, ნებისმიერი ასეთი მზადყოფნა იმისთვის, რომ კიდევ ერთხელ დავანახოთ აფხაზებსაც და ოსებსაც, რომ ჩვენ არ ვართ მტრები. ჩვენ გვაქვს საერთო ინტერესები და აფხაზების და ოსების ინტერესი ყველაზე უკეთ იქნება დაცული ერთიან ქართულ სახელმწიფოში,“ - განაცხადა დავით ბაქრაძემ.
ცნობისთვის, სერგეი შამბამ გამოცემა „ეხო მასკვისთან“ ინტერვიუში განაცხადა, რომ ქართველები მტრად არ მიაჩნია და საქართველოში მეგობრებიც ჰყავს.
