სწორად წარმოებული გამოძიება ობიექტური შედეგით დამთავრდა. მე და ჩემს ოჯახს გვინდა დიდი მადლობა გადავუხადოთ შსს-ს და ყველა სამართალდამცველს, ვინც მონაწილეობდა ამ საქმის გამოძიებაში, - ასე გამოეხმაურა გენერალ სამსონ ქუთათელაძის მეუღლე, მეგი სირბილაძე მისი ქმრის მკვლელობის საქმეზე გიორგი ჭანტურიას დაკავებას.
როგორც სირბილაძე განმარტავს, ქუთათელაძეს ჭანტურიას გარდა კონფქლიტი არავისთან ჰქონია.
"ისედაც ვიცოდით, რომ მკვლელი დაკავებული პიროვნება იყო და ამის საფუძველიც გვქონდა, რადგან მასა და ჩემს მეუღლეს შორის დიდი ხნის მანძილზე არსებობდა ფინანსური უთანხმოება. სწორედ ეს უთანხმოება იყო მკვლელობის მოტივი. საკმაოდ ხმამაღლა შემიძლია განვაცხადო, რომ ჩემს მეუღლეს სხვა პიროვნებებთან არანაირი კონფლიქტი არ ჰქონია, ის საერთოდ უკონფლიქტო პიროვნება იყო. ამით მე ვპასუხობ დაკავებული პირის ოჯახის განცხადებას, თითქოს ჩემს მეუღლეს არაერთ ადამიანთან ჰქონდა კონფლიქტი“,-აცხადებს სირბილაძე.
ის იმედს გამოთქვამს, რომ ბრალდებული კანონის მთელი სიმკაცრით დაისჯება.
