რადგან შსს-მ დაადგინა, რომ გიორგი ჭანტურია ალბათ დამნაშავეა, მე ვენდობი გამოძიებას იმიტომ, რომ ინტენსიურად მუშაობდნენ, - ამის შესახებ რუსთავის ე.წ. სტამბოლის ბაზრობის დირექტორმა მამუკა ცხოვრებაძემ ჟურნალისტებს განუცხადა.
როგორც ცხოვრებაძე აღნიშნავს, დაპირისპირება ქუთათელაძესა და ჭანტურიას შორის მკვლელობამდეც, გასული წლის ნოემბერშიც მოხდა, თუმცა რა მიზეზით, მისთვის უცნობია.
„რა იყო კონფლიქტის მიზეზი ამ ადამიანებს შორის ვერ გეტყვით, არ ვიცი. მაშინ ჩხუბი გარეთ მოხდა, ათასი კაცის თვალწინ. გიორგი ჭანტურია ამ 8 თვის განმავლობაში ბაზრის ტერიტორიაზე არ მინახავს, თუმცა ვიცი, რომ მოდიოდა“, - განაცხადა ცხოვრებაძემ.
როგორც ის განმარტავს, მკვლელობის დღეს, მას ჭანტურია ბაზარში არ უნახავს, თუმცა, არიან ადამიანები, რომლებმაც ქუთათელაძე-ჭანტურია ერთად დაინახეს. ვარაუდი, რომ შესაძლოა, ეს მკვლელობა ჭანტურიას ჩაედინა, მისი აზრი იყო.
„ეს იყო მხოლოდ ჩემი აზრი. როდესაც მე აქ ვიკითხე მეორე დღეს, ყველა საუბრობდა, რომ ერთად შევიდნენო. წარმოგიდგენიათ ადამიანები ერთად არიან რაღაც დროის განმავლობაში, სხვა არავინ ყოფილა და რას იფიქრებთ?! ამიტომ ვფიქრობდი ამას და ახლა, ალბათ შსს-მ იმუშავა. რა მტკიცებულებები აქვს შსს-მე ვერ გეტყვით, არ ვიცი. მე იანვარში გამომკითხეს, მის მერე არ გამოვუკითხივარ. რაც ვიცოდი, ის ვუთხარი გამოძიებას", - განაცხადა მამუკა ცხოვრებაძემ.
